സ്വകാര്യ ബസിനുള്ളിൽ കുഴഞ്ഞുവീണ് യുവാവ്; ആശുപത്രിയിൽ എത്തിച്ച് ജീവനക്കാർ
Mail This Article
പാലാ∙ സ്വകാര്യ ബസിനുള്ളിൽ കുഴഞ്ഞുവീണ യുവാവിനെ ആശുപത്രിയിൽ എത്തിച്ച് ബസ് ജീവനക്കാർ. ഞായറാഴ്ച 11 മണിയോടെ പാലാ - ഗാന്ധിനഗർ റൂട്ടിൽ സർവീസ് നടത്തുന്ന എംആൻഡ്എം ബസിലായിരുന്നു സംഭവം. ഗാന്ധിനഗറിൽ നിന്ന് പാലായിലേക്ക് പോകുകയായിരുന്ന ആർപ്പൂക്കര സ്വദേശിയായ യുവാവാണ് കുമ്മണ്ണൂർ ഭാഗത്തുവച്ച് അപസ്മാര ബാധിതനായി കുഴഞ്ഞുവീണത്.
ഉടൻ കണ്ടക്ടർ ഉണ്ണി ഡ്രൈവർ ഷാനിനെ വിവരം അറിയിച്ചു. ബസിന്റെ പ്ലാറ്റ്ഫോമിൽ വീണ യുവാവിനെ ഉണ്ണി മടിയിലേക്ക് എടുത്തുകിടത്തിയ ശേഷം ആശുപത്രിയിലേക്ക് തിരിക്കുകയായിരുന്നു. ഇടയ്ക്ക് സ്റ്റോപ്പിൽ ഇറങ്ങേണ്ട യാത്രക്കാരും ജീവനക്കാരുടെ പ്രവർത്തിയോട് സഹകരിച്ചു. യുവാവിനെ മാർ സ്ലീവാ മെഡിസിറ്റിയിൽ എത്തിച്ച ശേഷം ബസ് തിരികെ പോയി യാത്രക്കാരെ ഇറക്കി. അത്യാഹിത വിഭാഗത്തിൽ പ്രവേശിപ്പിച്ച യുവാവ് സുഖം പ്രാപിച്ചുവരുന്നു. ഡ്രൈവറെയും കണ്ടക്ടറെയും ആശുപത്രി അധികൃതർ അനുമോദിച്ചു.