പാമ്പാടിയിൽ ബൈക്കുകൾ കൂട്ടിയിടിച്ച് അപകടം; രണ്ട് പേർക്ക് പരുക്ക്
Mail This Article
കോട്ടയം∙ പാമ്പാടിയിൽ ബൈക്കുകൾ കൂട്ടിയിടിച്ചുണ്ടായ അപകടത്തിൽ രണ്ട് പേർക്ക് പരുക്കേറ്റു. പാമ്പാടി സ്വദേശി മാഹിൻ (28), മുണ്ടക്കയം മറ്റന്നൂർക്കര സ്വദേശി സാജൻ (47) എന്നിവർക്കാണ് പരുക്കേറ്റത്. വ്യാഴാഴ്ച രാത്രി ആണ് അപകടം നടന്നത്. കോട്ടയം ഭാഗത്തു നിന്നും കാഞ്ഞിരപ്പള്ളി ഭാഗത്തേക്ക് പോകുകയായിരുന്നു രണ്ട് ബൈക്കുകളും. ഇതിനിടയിൽ എരുമേലി സ്വദേശി സാജൻ റോഡിന്റെ മറുവശത്തേയ്ക്ക് തിരിക്കുകയും തൊട്ടു പുറകിൽ വന്ന മാഹിന്റെ ബൈക്ക് സാജന്റെ ബൈക്കിൽ ഇടിക്കുകയായിരുന്നു എന്ന് ദൃക്സാക്ഷികൾ പറഞ്ഞു.
അപകടത്തെ തുടർന്ന് രണ്ടു പേരെയും പാമ്പാടി താലൂക്ക് ആശുപത്രിയിൽ എത്തിച്ച് പ്രാഥമിക ചികിത്സ നൽകി. രണ്ടു പേർക്കും കൈയ്ക്ക് സാരമായ പരുക്ക് ഉണ്ട്. തുടർ ചികിത്സക്കായി മാഹിനെ കോട്ടയം കാരിത്താസിലെ സ്വകാര്യ ആശുപത്രിയിലും സാജനെ കോട്ടയം മെഡിക്കൽ കോളജിലും പ്രവേശിപ്പിച്ചു. പാമ്പാടി എസ്ഐ രമേശിന്റെ നേതൃത്വത്തിൽ പൊലീസ് എത്തി മേൽനടപടി സ്വീകരിച്ചു.