ബൈക്കും ടെംപോ ട്രാവലറും കൂട്ടിയിടിച്ച് അപകടം; യുവാവ് മരിച്ചു

കോട്ടയം ∙ നിയന്ത്രണം നഷ്‌ടപ്പെട്ട ബൈക്ക് ടെംപോ ട്രാവലറിൽ ഇടിച്ചുണ്ടായ അപകടത്തിൽ അതിരമ്പുഴ സ്വദേശിയായ യുവാവ് മരിച്ചു. ഒപ്പമുണ്ടായിരുന്ന സുഹൃത്തിനെ ഗുരുതരമായ പരുക്കുകളോടെ മുട്ടുചിറയിലെ സ്വകാര്യ ആശുപത്രിയിൽ പ്രവേശിപ്പിച്ചു. ശനിയാഴ്ച രാത്രി 10.30 ഓടെ കോട്ടയം - എറണാകുളം റോഡിൽ കോതനല്ലൂർ കളത്തൂർ കവലയിലാണ് അപകടം.

എറണാകുളം ഭാഗത്തുനിന്നും പത്തനംതിട്ട ഭാഗത്തേക്കു പോകുകയായിരുന്ന ട്രാവലറും എതിർ ദിശയിൽ മറ്റൊരു വാഹനത്തെ മറികടന്ന് എത്തിയ ബൈക്കും തമ്മിൽ കൂട്ടിയിടിക്കുകയായിരുന്നുവെന്ന് പൊലീസ് പറഞ്ഞു. ഇടിയുടെ ആഘാതത്തിൽ രണ്ടു പേരും റോഡിൽ തെറിച്ചു വീണു. ഇതുവഴി എത്തിയ പൊലീസ് സംഘമാണ് ഇരുവരെയും ആശുപത്രിയിൽ എത്തിച്ചത്. അപകടത്തെ തുടർന്ന് ഏറ്റുമാനൂർ കടുത്തുരുത്തി റോഡിൽ ഗതാഗത തടസവും ഉണ്ടായി.