ചെരാതുകളിൽ ഇടതു തുടർഭരണത്തിന്റെ വിജയാഘോഷം; വീടുകളിൽ പ്രവർത്തകർ മെഴുകുതിരികളും ചെരാതുകളും കൊളുത്തി

കോഴിക്കോട് ∙ ദീപം തെളിച്ചും പൂത്തിരി കത്തിച്ചും മധുരം വിതരണം ചെയ്തും ഇടതു തുടർഭരണത്തിന്റെ വിജയാഘോഷം. കോവിഡ് നിയന്ത്രണമുള്ളതിനാൽ വീടുകളിലും പാർട്ടി ഓഫിസുകളിൽ വളരെക്കുറച്ച് ആളുകളെ മാത്രം പങ്കെടുപ്പിച്ചുമാണ് വിജയാഘോഷം നടത്തിയത്. വീടുകളിൽ പ്രവർത്തകർ മെഴുകുതിരികളും ചെരാതുകളും കൊളുത്തി. ലഡുവും പായസവും വിതരണം  ചെയ്തു.

ചരിത്രത്തിലാദ്യമായി കേരളത്തിൽ‍ ഇടതുപക്ഷത്തിനു വൻവിജയത്തോടെ തുടർഭരണം ലഭിച്ച സന്ദർഭത്തിലാണ് ഇത്തരമൊരു വിജയാഘോഷം നടത്തിയതെന്ന് സിപിഎം ജില്ലാ സെക്രട്ടറി പി.മോഹനൻ പറഞ്ഞു. വിജയാഘോഷത്തിന്റെ ഭാഗമായി സിപിഎം ജില്ലാ കമ്മിറ്റി ഓഫിസിൽ അദ്ദേഹം മെഴുകുതിരികൾ തെളിച്ചു. സിപിഎം ജില്ലാ സെക്രട്ടേറിയറ്റ് അംഗം ടി.പി.ദാസൻ, എസ്എഫ്ഐ ജില്ലാ പ്രസിഡന്റ് ആർ. സിദ്ധാർഥ് തുടങ്ങിയവർ പങ്കെടുത്തു. ലഡു വിതരണം ചെയ്തു.

എളമരം കരീം എംപി, സിപിഐ ജില്ലാസെക്രട്ടറി ടി.വി.ബാലൻ, മുക്കം മുഹമ്മദ്, എ.പ്രദീപ് കുമാർ, ഡിവൈഎഫ്ഐ ജില്ലാസെക്രട്ടറി വി.വസീഫ്,  നിയുക്ത എംഎൽഎമാരായ ടി.പി.രാമകൃഷ്ണൻ, പി.എ.മുഹമ്മദ്റിയാസ്, കെ.പി.കുഞ്ഞമ്മദ്കുട്ടി, ഇ.കെ.വിജയൻ, തോട്ടത്തിൽ രവീന്ദ്രൻ, അഹമ്മദ് ദേവർകോവിൽ, പി.ടി.എ.റഹീം, കാനത്തിൽ ജമീല, എ.കെ.ശശീന്ദ്രൻ, കെ.എം.സച്ചിൻദേവ്, ലിന്റോ ജോസഫ്  തുടങ്ങിയ എൽഡിഎഫ് നേതാക്കൾ വീടുകളിലും പാർട്ടി ഓഫിസുകളിലും വിജയാഘോഷത്തിൽ പങ്കാളികളായി.