ഇതാ പുതിയ വേദി; ടഗോർ ഹാൾ വളപ്പിൽ; 500 പേർക്ക് പരിപാടികൾ കാണാനുള്ള സൗകര്യം
Mail This Article
കോഴിക്കോട് ∙ കലാ–സാംസ്കാരിക പരിപാടികൾക്ക് നഗരത്തിൽ ഹാളില്ലാത്ത സാഹചര്യത്തിൽ കോർപറേഷൻ ടഗോർ ഹാൾ വളപ്പിൽ താൽക്കാലിക വേദി ഒരുക്കി. ടഗോർ ഹാളിന്റെ പാർക്കിങ് ഷെഡിൽ സ്റ്റേജ് ഒരുക്കിയാണ് താൽക്കാലിക വേദി തയാറാക്കിയത്. ടഗോർ ഹാൾ പൊളിച്ചു പണിയുന്നതിന്റെ ഭാഗമായി അടച്ചിടുകയും ടൗൺഹാൾ നവീകരണത്തിനായി പൂട്ടുകയും ചെയ്ത സാഹചര്യത്തിലാണിത്.
പുതിയ സംവിധാനത്തിൽ 500 പേർക്ക് പരിപാടികൾ കാണാനുള്ള സൗകര്യമുണ്ടാകുമെന്നു കോർപറേഷൻ സ്ഥിരം സമിതി അധ്യക്ഷൻ പി.സി.രാജൻ പറഞ്ഞു. ടൗൺഹാളിന്റെ അതേ വാടകയാണ് ഇവിടെയും സാംസ്കാരിക പരിപാടികൾക്ക് ഈടാക്കുകയെന്നും ബുക്കിങ് ആരംഭിച്ചതായും അദ്ദേഹം പറഞ്ഞു.
നഗരത്തിൽ കോർപറേഷൻ ഹാളുകളുടെ അഭാവം കാരണം കലാ–സാംസ്കാരിക പരിപാടികൾ അവതരിപ്പിക്കാൻ ഹാളുകൾ ഇല്ലാത്തതിന്റെ പേരിൽ നഗരത്തിലെ കലാ–സാംസ്കാരിക സംഘടനകളുടെ കൂട്ടായ്മയായ കലാ സാംസ്കാരിക സംയുക്ത വേദി പ്രക്ഷോഭത്തിനു ഒരുങ്ങിയിരുന്നു. തുടർന്ന് മേയർ ബീന ഫിലിപ്പും ഡപ്യൂട്ടി മേയർ സി.പി.മുസാഫർ അഹമ്മദും കലാ സാംസ്കാരിക സംയുക്ത വേദി ഭാരവാഹികളുമായി ചർച്ച നടത്തുകയും ടഗോർ ഹാൾ വളപ്പിൽ താൽക്കാലിക വേദി ഒരുക്കാമെന്ന് ഉറപ്പ് നൽകുകയും ചെയ്തിരുന്നു.