റോഡ് നന്നാക്കി മിനിറ്റുകൾക്കകം ചെളിക്കുണ്ടായി

വടകര ∙ ദേശീയപാതയുടെ പണി നടക്കുന്ന ഭാഗത്തെ കുഴി നിറഞ്ഞ സർവീസ് റോഡ് നന്നാക്കി മിനിറ്റുകൾക്കകം ചെളി നിറഞ്ഞു.  ഇന്നലെ രാവിലെ നോർത്ത് പാർക്കിനു സമീപം ടാറിട്ട് മിനുക്കിയ റോഡാണ് സമീപത്ത് പൈൽ അടിക്കുന്ന ഭാഗത്തെ ചെളിയും മണ്ണും ഒലിച്ചു വന്ന് തകർന്നത്.  കുഴി നിറഞ്ഞതു കൊണ്ട് സർവീസ് റോഡ് വഴി ഗതാഗതം ബുദ്ധിമുട്ടായിരുന്നു. ഇത് പരിഹരിക്കാൻ ഇന്നലെ രാവിലെ മുതൽ മെറ്റലും ടാറും ചേർന്ന മിശ്രിതം കൊണ്ട് റോഡ് നന്നാക്കിയെങ്കിലും അണ പൊട്ടിയതു പോലെ ചെളി വെള്ളം റോഡിൽ നിറഞ്ഞു. ഇതേ തുടർന്ന് നല്ല വെള്ളം കൊണ്ടു വന്ന് റോഡ് വൃത്തിയാക്കിയെങ്കിലും പല ഭാഗവും തകർന്ന അവസ്ഥയിലാണ്.