നാട്ടുകാർക്കുനേരെ തോക്കുചൂണ്ടി ഗുണ്ടാസംഘം; രണ്ടുപേരെ പിടികൂടി പൊലീസിൽ ഏൽപിച്ചു

പരപ്പനങ്ങാടി∙ കൈത്തോക്കും വടിവാളും ഉൾപ്പെടെയുള്ള മാരകായുധങ്ങളുമായെത്തിയ സംഘത്തെ നാട്ടുകാർ പിടികൂടി പൊലീസിൽ ഏൽപിച്ചു. പരപ്പനങ്ങാടി ആലുങ്ങൽ ബീച്ചിൽ ഇന്നലെ രാത്രി 8നാണു സംഭവം. കൊച്ചി വൈപ്പിനിൽനിന്നുള്ള അഞ്ചംഗ സംഘമാണ് ആലുങ്ങൽ ബീച്ചിലെത്തിയത്. ഇവരുടെ കടത്തുസ്വർണം തട്ടിയെടുത്ത ആളെ തേടിയാണ് ഇവിടെയെത്തിയതെന്നു കരുതുന്നു.

സംശയം തോന്നി പ്രദേശവാസികൾ ചോദ്യംചെയ്തതോടെ ഒരാൾ നാട്ടുകാർക്കു നേരെ തോക്കുചൂണ്ടി. ഇതോടെ നാട്ടുകാർ സംഘടിച്ചു സംഘത്തെ നേരിടുകയായിരുന്നു. സംഘർഷത്തിനിടെ 3 പേർ കടന്നുകളഞ്ഞു. 2 പേരെ കെട്ടിയിട്ട ശേഷം പൊലീസിനു കൈമാറി. പരുക്കേറ്റ ഇവരെ പൊലീസ് കസ്റ്റഡിയിലെടുത്ത് തിരൂരങ്ങാടി താലൂക്ക് ആശുപത്രിയിൽ പ്രവേശിപ്പിച്ചു.