എടവണ്ണയിൽ കനത്ത മഴയിലും കാറ്റിലും വ്യാപകനാശം

മലപ്പുറം∙ എടവണ്ണയിൽ കനത്ത മഴയിലും കാറ്റിലും വ്യാപകനാശം. ഒട്ടേറെ മരങ്ങൾ കടപുഴകി വീണു. വീടുകളുടെ മേൽക്കൂരയിലെ ഓടുകൾ പാറി വീണു. മരങ്ങൾ മുകളിലേക്ക് മറിഞ്ഞ് പത്തോളം വീടുകൾക്കും കേടുപാടുണ്ടായിട്ടുണ്ട്. ഉച്ചയ്ക്ക് 2 മണിയോടെയായിരുന്നു സംഭവം. ഒന്നരമണിക്കൂറോളം മഴയും കാറ്റും തുടർന്നു. കൃഷിയും വ്യാപകമായി നശിച്ചു. 

പത്തപ്പിരിയം, എടവണ്ണ, തൂവക്കാട്, പന്നിപ്പാറ, പാലപ്പറ്റ, ആര്യൻതൊടിക, ചളിപ്പാലം തുടങ്ങിയ ഭാഗങ്ങളിലാണ് കൂടുതൽ നാശനഷ്ടങ്ങൾ. വൈദ്യുതിത്തൂണുകൾ പൊട്ടിവീണു. മരങ്ങളും വൈദ്യുത പോസ്റ്റുകളും വീണ് ഗതാഗതം മുടങ്ങി. സന്നദ്ധപ്രവർത്തകരുടെയും നാട്ടുകാരുടെയും ഇആർഎഫിന്റെയും നേതൃത്വത്തിൽ റോഡിൽ വീണ മരങ്ങൾ മുറിച്ചുമാറ്റി.