മണ്ണാത്തിക്കുളം 50 ലക്ഷം രൂപ ചെലവിൽ നവീകരിക്കും

അങ്ങാടിപ്പുറം ∙ പഞ്ചായത്തിലെ 17–ാം വാർഡിലുൾപ്പെട്ട പരിയാപുരത്ത് കിഴക്കെമുക്ക് മണ്ണാത്തിക്കുളം നവീകരണത്തിന് 50 ലക്ഷം രൂപയുടെ പദ്ധതി. അങ്ങാടിപ്പുറം പഞ്ചായത്തിലെ പഴക്കമേറിയ കുളങ്ങളിലൊന്നാണ് ഇത്.  വികസന സമിതിയുടെ നേതൃത്വത്തിൽ നടത്തിയ ശ്രമഫലമായി മന്ത്രി റോഷി അഗസ്‌റ്റിന്റെ ഫണ്ടിൽ നിന്നാണ് തുക വകയിരുത്തിയത്. ടെൻഡർ നടപടികൾ പൂർത്തിയാക്കി. പഞ്ചായത്തിന്റെ നീന്തൽ കുളമായാണ് നവീകരണം. വിവിധ വിദ്യാലയങ്ങളുടെയും നാട്ടുകാരുടെയും ഏറെ നാളത്തെ ആഗ്രഹമാണ് ഒരു നീന്തൽക്കുളം. കുളത്തിന്റെ നിർമാണം ജലനിരപ്പ് കുറഞ്ഞാലുടനെ ആരംഭിക്കുമെന്ന് വാർഡംഗം അനിൽ പുലിപ്ര പറഞ്ഞു. നിലവിൽ ഈ കുളത്തിനടുത്തേക്ക് ഗതാഗത സൗകര്യമില്ല. അതിനാൽ പുതിയ വഴി ഒരുക്കുമെന്ന് പഞ്ചായത്ത് വൈസ് പ്രസിഡന്റ് ഷബീർ കറുമുക്കിൽ പറഞ്ഞു.