കുറ്റിപ്പുറം റെയിൽവേ മേൽപാലം ജോലി അവസാനഘട്ടത്തിൽ
Mail This Article
കുറ്റിപ്പുറം ∙ ആറുവരിപ്പാത നിർമാണത്തിന്റെ ഭാഗമായി കുറ്റിപ്പുറത്ത് സ്ഥാപിക്കുന്ന റെയിൽവേ മേൽപാലത്തിന്റെ ജോലികൾ അവസാനഘട്ടത്തിലേക്ക്. ഷൊർണൂർ–മംഗളൂരു റെയിൽപാതയ്ക്കു മുകളിലുടെ ‘റ’ ആകൃതിയിൽ സ്ഥാപിക്കുന്ന ഉരുക്കുപാലത്തിന്റെ നിർമാണം പുരോഗമിക്കുകയാണ്. റെയിൽവേ ട്രാക്കിന് മുകളിൽ സ്ഥാപിക്കാനുള്ള ഉരുക്കുപാലം സമീപത്തെ സ്ഥലത്ത് നിർമിച്ച ശേഷം ട്രാക്കുകൾക്ക് ഇരുവശത്തുമുള്ള തൂണുകൾക്ക് മുകളിൽ സ്ഥാപിക്കുകയാണ് ചെയ്യുക.
നിർമാണ ജോലികൾക്കിടെ ട്രെയിൻ ഗതാഗതം തടസ്സപ്പെടാതിരിക്കാനാണിത്. ആറുവരിപ്പാത നിർമാണത്തിന്റെ ഭാഗമായുള്ള റെയിൽവേ മേൽപാലത്തിന് റെയിൽവേയുടെ അനുമതി ലഭിക്കാൻ ഏറെ വൈകിയത് ദേശീയപാത നിർമാണത്തെയും ബാധിച്ചിരുന്നു. കോഴിക്കോട് ഭാഗത്തേക്കുള്ള മൂന്നുവരിയിലാണ് പുതിയ ആർഒബി നിർമിക്കുന്നത്. ദേശീയപാതയിൽ നിലവിലുള്ള റെയിൽവേ മേൽപാലം അതേപടി നിലനിർത്തി എറണാകുളം ഭാഗത്തേക്കുള്ള ട്രാക്കിനായി ഉപയോഗിക്കും.