മദ്യപാനത്തിനിടെ കയ്യാങ്കളി: അതിഥിത്തൊഴിലാളി മരിച്ചു; സുഹൃത്ത് അറസ്റ്റിൽ

കൊണ്ടോട്ടി ∙ സുഹൃത്തുക്കളുടെ മദ്യപാനത്തിനിടെയുണ്ടായ കയ്യാങ്കളിയിൽ തലയിടിച്ചു വീണ അതിഥിത്തൊഴിലാളി സംഭവസ്ഥലത്തു മരിച്ചു. സുഹൃത്ത് അറസ്റ്റിൽ. മോങ്ങം ഹിൽടോപ്പിലെ ലോഡ്ജ് മുറിയിൽ ഇന്നലെ രാവിലെ ഒൻപതരയോടെയായിരുന്നു സംഭവം. തമിഴ്‌നാട് നാഗപട്ടണം മൈലാടുംതുറ സ്വദേശി ബൽറാം (45) ആണു മരിച്ചത്.  നാഗപട്ടണം മൈലാടുംതുറ സ്വദേശിയായ വാസു (40)വിനെ അറസ്റ്റ് ചെയ്തതായി ഡിവൈഎസ്പി സി.കെ.സേതു അറിയിച്ചു.

നാലു പേർ ചേർന്ന് മദ്യപിക്കുന്നതിനിടെയുണ്ടായ തർക്കത്തിനിടെ വാസു തള്ളിയപ്പോൾ ബൽറാം ഭിത്തിയിൽ തലയിടിച്ചു വീഴുകയായിരുന്നെന്ന് പൊലീസ് പറഞ്ഞു. ഹിൽടോപ്പിൽ മറ്റൊരു സുഹൃത്ത് താമസിക്കുന്ന ലോഡ്ജിൽ എത്തി മദ്യപിക്കുന്നതിനിടെയാണ് സംസാരം കയ്യാങ്കളിയിൽ എത്തിയത്.

ഗുരുതര പരുക്കേറ്റ ബൽറാം സംഭവസ്ഥലത്തുതന്നെ മരിച്ചു. നാട്ടുകാർ പൊലീസിൽ അറിയിക്കുകയായിരുന്നു. വാസുവിനെ സിഐ പി.എം.ഷമീറിന്റെ നേതൃത്വത്തിൽ പൊലീസ് പിടികൂടി. ഇന്നു കോടതിയിൽ ഹാജരാക്കും. ബൽറാമിന്റെ മൃതദേഹം മഞ്ചേരി മെഡിക്കൽ കോളജ് മോർച്ചറിയിലേക്കു മാറ്റി. പോസ്റ്റ്മോർട്ടത്തിനു ശേഷം ബന്ധുക്കൾക്കു വിട്ടുനൽകും. ബൽറാമും വാസുവും  മോങ്ങത്ത് കൽപണിക്കാരാണ്. വിരലടയാള വിദഗ്ധരും ഫൊറൻസിക് വിഭാഗവും  പരിശോധന നടത്തി.