നിർത്തിയിട്ട കാർ കത്തിനശിച്ചു; സംഭവം പെരിന്തൽമണ്ണ പൊന്ന്യാകുർശിയിൽ

പെരിന്തൽമണ്ണ∙ പൊന്ന്യാകുർശിയിൽ റോഡിൽ നിർത്തിയിട്ട കാർ കത്തിനശിച്ചു. ഇന്നലെ പുലർച്ചെ അഞ്ചരയോടെയാണ് സംഭവം.  കിഴിശ്ശേരി മണ്ണിൽ ഷഫീഖിന്റെ കാറാണ് കത്തിനശിച്ചത്.  കാർ നിർത്തി സമീപത്തെ പള്ളിയിലേക്ക് നമസ്കാരത്തിനായി പോയതായിരുന്നു. ഈ സമയം ബോണറ്റിനുള്ളിൽനിന്ന് തീയും പുകയും ഉയരുകയായിരുന്നു. ഉടൻ തന്നെ നാട്ടുകാർ അറിയിച്ചതനുസരിച്ച് പെരിന്തൽമണ്ണ ഫയർ അസി. സ്‌റ്റേഷൻ ഓഫിസർ പി.നാസറിന്റെ നേതൃത്വത്തിൽ സീനിയർ ഫയർ ആൻഡ് റെസ്‌ക്യു ഓഫിസർ കെ.സജിത്ത്, ഫയർ ആൻഡ് റെസ്‌ക്യു ഓഫിസർമാരായ രാമദാസ്, സുജിത്ത്, ഹർഷാദ്, ഡ്രൈവർമാരായ പ്രശാന്ത്, നസീർ, ഹോംഗാർഡുമാരായ ശിവദാസ്, സുബ്രഹ്‌മണ്യൻ എന്നിവരുൾപ്പെട്ട സംഘം എത്തിയാണ്   തീയണച്ചത്. കാറിന്റെ മുൻഭാഗവും സീറ്റുകളും പാടേ കത്തി നശിച്ചു. ഷോർട്സർക്യൂട്ടാണ് തീപിടിത്തത്തിന് കാരണമെന്നാണു നിഗമനം.