കുമ്പളംചോല ദേവപ്പാറ ക്വാറി പ്രവർത്തനം പുനരാരംഭിക്കണം: ആവശ്യവുമായി എംഎൽഎ

കാഞ്ഞിരപ്പുഴ ∙ കാഞ്ഞിരപ്പുഴ ജലസേചന പദ്ധതിയുടെ കീഴിലെ കുമ്പളംചോല ദേവപ്പാറ ക്വാറിയുടെ പ്രവർത്തനം പുനരാരംഭിക്കണം എന്നാവശ്യപ്പെട്ടു കെ.ശാന്തകുമാരി എംഎൽഎ നിയമസഭയിൽ ഉപക്ഷേപം അവതരിപ്പിച്ചു. കേന്ദ്ര പരിസ്ഥിതി മന്ത്രാലയത്തിന്റെ അനുമതി ലഭിച്ചിട്ടും ക്വാറി പ്രവർത്തിക്കുന്നില്ല. ക്വാറി നടത്താൻ ജലവിഭവ വകുപ്പിൽ അപേക്ഷ നൽകിയിട്ടുണ്ട്. വിവധ വകുപ്പുകളിൽ നിന്ന് അനുമതി ലഭിച്ചിട്ടുണ്ട്. എന്നിട്ടും 8 വർഷമായി പ്രവർത്തനം മുടങ്ങിക്കിടക്കുന്നു.

പ്രദേശത്തെ നൂറുകണക്കിനു ജനങ്ങളുടെ ഉപജീവനമാർഗമായ ക്വാറി എത്രയും പെട്ടെന്നു തുടങ്ങണമെന്നും എംഎൽഎ ആവശ്യപ്പെട്ടു.പ്രദേശത്തു കരിങ്കൽ ക്ഷാമം നിർമാണമേഖലയെയും ലൈഫ് അടക്കമുള്ള പദ്ധതികളെയും പ്രതികൂലമായി ബാധിക്കുന്നു. ക്വാറിയെ ആശ്രയിക്കുന്ന നൂറുകണക്കിനു കുടുംബങ്ങളും ടിപ്പർ, ട്രാക്ടർ, ലോഡിങ് തൊഴിലാളികളും ദുരിതത്തിലാണ്.