പട്ടാമ്പി പൊലീസ് സ്റ്റേഷൻ തുടർച്ചയായി ജില്ലയിലെ മികച്ച പൊലീസ് സ്റ്റേഷൻ
Mail This Article
പട്ടാമ്പി∙ ജില്ലയിലെ മികച്ച പൊലീസ് സ്റ്റേഷൻ ആയി പാലക്കാട് ജില്ലാ പൊലീസ് മേധാവി തുടർച്ചയായി കഴിഞ്ഞ 5 മാസങ്ങളിലും പട്ടാമ്പി പൊലീസ് സ്റ്റേഷനെ തിരഞ്ഞെടുത്തു. സ്ത്രീകൾക്കും കുട്ടികൾക്കും എതിരെയുള്ള അക്രമങ്ങൾ തടയുക, ലഹരി ഉൽപന്നങ്ങൾ പിടിച്ചെടുക്കുക, അനധികൃത ലോട്ടറി, ചൂതാട്ടം എന്നിവ കണ്ടെത്തി നടപടി സ്വീകരിക്കുക, മോഷണം തുടങ്ങിയ കുറ്റകൃത്യങ്ങൾ തടയുക, ക്രമസമാധാന പരിപാലനം, വാറണ്ട് കേസുകളിലെ പ്രതികളെ അറസ്റ്റ് ചെയ്ത് കോടതിയിൽ ഹാജരാക്കുക, കേസുകൾ സമയബന്ധിതമായി അന്വേഷണം പൂർത്തിയാക്കി കുറ്റപത്രം കോടതിയിൽ സമർപ്പിക്കുക, സാമൂഹിക വിരുദ്ധർക്കെതിരെ കർശന നടപടികൾ സ്വീകരിക്കുക, വാഹന അപകടങ്ങൾ കുറയ്ക്കുക, ട്രാഫിക് നിയന്ത്രണം തുടങ്ങിയ വിവിധ മേഖലകളിലെ മികവിനാണ് പട്ടാമ്പി പൊലീസ് സ്റ്റേഷനെ ജില്ലയിലെ മികച്ച പൊലീസ് സ്റ്റേഷനായി തിരഞ്ഞെടുത്തിരിക്കുന്നത്.
പട്ടാമ്പി പൊലീസ് സ്റ്റേഷൻ പരിധിയിലെ പൊതുജനങ്ങളുടെയും സഹകരണം കൊണ്ടും പൊലീസ് സ്റ്റേഷനിലെ മുഴുവൻ പൊലീസ് ഉദ്യോഗസ്ഥരുടെയും ആത്മാർഥമായ പ്രവർത്തനം കൊണ്ടുമാണ് പട്ടാമ്പി പൊലീസ് സ്റ്റേഷന് തുടർച്ചയായി ഈ നേട്ടം കൈവരിക്കാനായതെന്ന് പൊലീസ് പറഞ്ഞു. ഷൊർണൂർ ഡിവൈഎസ്പി, ആർ.മനോജ്‌ കുമാർ, പട്ടാമ്പി സ്റ്റേഷൻ ഓഫിസർ പി. കെ. പത്മരാജൻ, സബ് ഇൻസ്‌പെക്ടർ കെ. മണികണ്ഠൻ എന്നിവരുടെ നേതൃത്വത്തിലുള്ള സംഘമാണ് മികച്ച സേവനത്തിന് നേതൃത്വം നൽകുന്നത്.
