ശിവഗിരി തീർഥാടന പദയാത്ര പുറപ്പെട്ടു

തിരുവല്ല ∙ എസ്എൻഡിപി യോഗം തിരുവല്ല യൂണിയന്റെ 12-ാമത് ശിവഗിരി തീർഥാടന പദയാത്ര പുറപ്പെട്ടു. യൂണിയൻ ഓഫിസ് സതീഷ് കൊച്ചുപറമ്പിൽ ഉദ്ഘാടനം നിർവഹിച്ചു. പദയാത്രാ ക്യാപ്റ്റനും യൂണിയൻ പ്രസിഡന്റുമായ ബിജു ഇരവിപേരൂരിന് യോഗം ഇൻസ്‌പെക്ടിങ് ഓഫിസർ രവീന്ദ്രൻ എഴുമറ്റൂർ പീതപതാക കൈമാറി. യൂണിയൻ സെക്രട്ടറി അനിൽ എസ്.ഉഴത്തിൽ അധ്യക്ഷത വഹിച്ചു. യൂണിയൻ കൗൺസിലർമാരായ രാജേഷ് മേപ്രാൽ, അനിൽ ചക്രപാണി, സരസൻ ഓതറ, മനോജ് ഗോപാൽ, പഞ്ചായത്ത് കമ്മിറ്റിയംഗങ്ങളായ കെ.കെ.രവി, കെ.എൻ.രവീന്ദ്രൻ, വനിതാസംഘം സെക്രട്ടറി മണിയമ്മ സോമശേഖരൻ എന്നിവർ പ്രസംഗിച്ചു. തിരുവല്ലയിൽ നിന്ന് പുറപ്പെട്ട പദയാത്ര മാവേലിക്കര, കായംകുളം, കരുനാഗപ്പള്ളി, ചവറ, കൊല്ലം, ചാത്തന്നൂർ, വർക്കല യൂണിയനുകളുടെ സ്വീകരണം ഏറ്റുവാങ്ങി 30ന് ഉച്ചയോടെ ശിവഗിരി എത്തിച്ചേരും.

പദയാത്രികർക്ക് ലഘുഭക്ഷണം ഒരുക്കി എഐവൈഎഫ് 
തിരുവല്ല ∙ എഐവൈഎഫ് തിരുവല്ല ടൗൺ മേഖല കമ്മിറ്റി ശിവഗിരി പദയാത്രികർക്കു ലഘു ഭക്ഷണവും പാനീയവും വിതരണം ചെയ്തു . സി.പി.ഐ ലോക്കൽ കമ്മിറ്റി അംഗം അനിൽ മുത്തൂർ ഉദ്ഘാടനം ചെയ്തു. എഐവൈഎഫ് ടൗൺ മേഖല സെക്രട്ടറി വിഷ്ണു ഭാസ്കർ, കമ്മിറ്റി അംഗങ്ങളായ മനോജ് കൊച്ചുവീട്ടിൽ, ഹരികൃഷ്ണൻ , ജിജോ ചാക്കോ ,എസ്.ചന്ദ്രേഷ്, ജ്യോതിഷ് ജോയ്, ബിൻസൺ ജോർജ് , സാലു ജോൺ, അനിത പ്രസാദ് എന്നിവർ നേതൃത്വം നൽകി.