ഗതാഗതക്കുരുക്ക് രൂക്ഷമാക്കി അനധികൃത പാർക്കിങ്

ചുങ്കപ്പാറ ∙ പാതയോരങ്ങളിലെ അനധികൃത പാർക്കിങ് ഗതാഗതക്കുരുക്ക് രൂക്ഷമാക്കുന്നു. ചുങ്കപ്പാറ - പൊന്തൻപുഴ റോഡിലാണ് മിക്ക ദിവസങ്ങളിലും ഈ കാഴ്ച. സെൻട്രൽ ജംക്‌ഷൻ മുതൽ പഴയ തിയറ്റർപ്പടി വരെ റോഡിന്റെ ഇരുവശങ്ങളിലും വാഹനങ്ങൾ അലക്ഷ്യമായി പാർക്ക് ചെയ്യുന്നതാണ് ഗതാഗതക്കുരുക്കിന് പ്രധാന കാരണം.. ആശുപത്രിയും നിരവധി ധനകാര്യ സ്ഥാപനങ്ങളും എടിഎം എന്നിവയുടെ പ്രവേശനകവാടം പാതയോരത്തായാതിനാൽ ഇവിടങ്ങളിൽ എത്തുന്നവർകൂടി വാഹനങ്ങൾ പാർക്ക് ചെയ്യുമ്പോൾ കുരുക്ക് രൂക്ഷമാക്കുന്നു.

നിയന്ത്രിത സ്കൂൾ സമയങ്ങൾ കഴിഞ്ഞ് ഇരുദിശയിൽ നിന്നും വലിയവാഹനങ്ങൾ വന്നാൽ കടന്നുപോകാൻ കഴിയാത്ത സ്ഥിതിയാണ്, മിക്കപ്പോഴും. വാഹനം പാർക്ക് ചെയ്തവർ തിരികെ വന്ന് വാഹനം നീക്കുന്നതുവരെ കാത്തുകിടക്കേണ്ട ഗതികേടിലാണ്. ഈ സമയത്ത് അവശ്യ സർവീസുകളുടെ സഞ്ചാരമടക്കം തടസ്സപ്പെടുന്നു. അധികൃതരുടെ അടിയന്തര ശ്രദ്ധപതിയണമെന്ന ആവശ്യം ശക്തമാണ്.