ട്രാൻസ്ഫോമറും വൈദ്യുതി തൂണുകളും അപകടഭീഷണി

വള്ളിക്കോട് ∙ ആനയടി –കൂടൽ റോഡിന്റെ നിർമാണം ഏകദേശം പൂർത്തിയായെങ്കിലും റോഡരികിലേക്ക് തള്ളിനിൽക്കുന്ന വൈദ്യുതി തൂണുകളും ട്രാൻസ്ഫോമറും മാറ്റിസ്ഥാപിക്കാത്തതിനാൽ അപകടങ്ങൾ വർധിക്കുന്നതായി പരാതി. ചന്ദനപ്പള്ളി മുതൽ നെടുമൺകാവ് ഭാഗം വരെ പലയിടത്തും ഇത്തരത്തിൽ വൈദ്യുതി തൂണുകൾ റോഡിലേക്ക് തള്ളി നിൽക്കുന്നതായി പരാതിയുണ്ട്. ചന്ദനപ്പള്ളി ജംക്‌ഷനു സമീപം സ്കൂളിന്റെ മു‍ൻവശം, വലിയ പള്ളിക്ക് സമീപം എന്നിവിടങ്ങളിൽ നിന്നിരുന്ന വൈദ്യുതി തൂണും ട്രാൻസ്ഫോമറും റോഡ് വികസിപ്പിച്ചെങ്കിലും ആ സ്ഥലത്തു തന്നെ നിൽക്കുകയാണ്. ഏതാനും മാസങ്ങൾക്ക് മുൻപ് രാത്രി കൊടുമൺ സ്വദേശിയായ ബൈക്ക് യാത്രക്കാരന് പോസ്റ്റിലിടിച്ച് പരുക്കേറ്റിരുന്നു. പല ഭാഗത്തും റോഡിന് വീതിയില്ലാത്ത അവസ്ഥയാണ്.