തീർഥാടന പാതയിൽ മൊബൈൽ നെറ്റ്‌വർക് കവറേജ് കുറവ്

നിലയ്ക്കൽ∙ശബരിമല തീർഥാടന പാതയിൽ മൊബൈൽ ഫോണിനു റേഞ്ച് വളരെ കുറവ്. അടിയന്തര സാഹചര്യത്തിൽ പുറം ലോകവുമായി ബന്ധപ്പെടാൻ കഴിയാത്ത സാഹചര്യം. റേഞ്ച് തീർത്തും ഇല്ലാത്ത പ്രദേശങ്ങൾ നോക്കി പാതയിൽ വാഹനത്തിൽ ഘടിപ്പിക്കാവുന്ന മൊബൈൽ ടവറുകൾ സ്ഥാപിക്കണമെന്നാവശ്യം. റേഞ്ച് ഇല്ലാത്ത സ്ഥലത്ത് ടവറുകൾ വഹിച്ച വാഹനങ്ങൾ മുൻപ് എത്തിക്കുന്ന പതിവ് ഉണ്ടായിരുന്നു. തീർഥാടന പാതയിൽ ഒട്ടേറെ സ്ഥലത്ത് റേഞ്ച് ഇല്ലാതിരുന്നതിനാലാണ് കഴിഞ്ഞ ദിവസം വെളുപ്പിനെ നിലയ്ക്കലിനും ചാലക്കയത്തിനും മധ്യേ വനത്തിൽ കെഎസ്ആർടിസി ബസിനു തീ പിടിച്ചിട്ടും യഥാസമയം രക്ഷാപ്രവർത്തകരെ അറിയിക്കാൻ കഴിയാതെ പോയതെന്ന് പറയുന്നു. തിരക്ക് വർധിച്ചതോടെ അപകടങ്ങളും കൂടി.