വേറ്റിനാട് നിന്നും കെഎസ്ആർടിസി സർവീസിന് തുടക്കം

നെടുമങ്ങാട്∙ ഗാന്ധിജയന്തി ദിനത്തിൽ നെടുമങ്ങാട് മണ്ഡലത്തിൽ കെഎസ്ആർടിസി സ്വിഫ്റ്റ് പുതിയ ബസ് സർവീസ് ആരംഭിച്ചു. വേറ്റിനാട് ഗാന്ധി സ്മാരക മണ്ഡപത്തിൽ നിന്നു കിഴക്കേകോട്ടയിലേക്കുള്ള പുതിയ ബസ് സർവീസ് മന്ത്രി ജി.ആർ.അനിൽ ഫ്ലാഗ് ഓഫ് ചെയ്തു.  ഈ പ്രദേശത്തെ ജനങ്ങളുടെ ദീർഘനാളത്തെ യാത്ര ക്ലേശത്തിനാണ് ഇതോടെ പരിഹാരമായിരിക്കുന്നതെന്ന് മന്ത്രി അഭിപ്രായപ്പെട്ടു.

പേരൂർക്കട ബസ് ഡിപ്പോയിൽ നിന്നുള്ള സ്വിഫ്റ്റ് ബസ് രാവിലെ 7ന് കിഴക്കേകോട്ട നിന്നും പട്ടം - നാലാഞ്ചിറ - മണ്ണന്തല - വട്ടപ്പാറ - കണക്കോട് വഴി വേറ്റിനാട് ഗാന്ധി സ്മാരക മണ്ഡപത്തിലേക്കും, തിരികെ 7.50 ന് കിഴക്കേകോട്ടയിലും നടത്തും.  വൈകിട്ട് 4 ന് കിഴക്കേകോട്ടയിൽ നിന്നും ഗാന്ധി സ്മാരക മണ്ഡപത്തിലേക്കും വൈകിട്ട് 5 ന് ഗാന്ധി സ്മാരക മണ്ഡപത്തിൽ നിന്നും കിഴക്കേകോട്ടയിലേക്കുമാണ് സർവീസ്. ഫ്ലാഗ് ഓഫ് ചടങ്ങിൽ വെമ്പായം ഗ്രാമ പഞ്ചായത്ത് പ്രസിഡന്റ് ബീന ജയൻ പ്രസംഗിച്ചു.