മൂന്നു വർഷത്തിനിടെ മൂന്നു തവണ മിന്നൽ; മംഗലപുരത്ത് വീടിന് നാശനഷ്ടം
Mail This Article
പോത്തൻകോട് ∙ശക്തമായ മിന്നലിൽ മംഗലപുരം അനിതാ കോട്ടേജിൽ അൻസറിന്റെ വീടിന് വ്യാപക നാശനഷ്ടം. വരാന്തയിൽ സ്ഥാപിച്ചിരുന്ന മീറ്റർ ബോർഡ് പൊട്ടിത്തെറിച്ചു. വയറിങ്ങും കത്തി നശിച്ചു. ടിവി, ഫ്രിജ്, വാഷിങ്മെഷീൻ, ഫാൻ തുടങ്ങിയ ഇലക്ട്രിക് ഉപകരണങ്ങളും കേടായി. അടുക്കള ഭാഗത്ത് പലയിടങ്ങളിലായി തറയിലെ ടൈൽസും സ്ലാബിന്റെ ചില ഭാഗങ്ങളും പൊട്ടിത്തെറിച്ചു.
തൊട്ടടുത്ത മുറിയുടെ കോൺക്രീറ്റ്് ചെയ്ത അടിഭാഗത്തും പൊട്ടലുണ്ടായി. മുറിയിലെ കോൺക്രീറ്റ് സീലിങ്ങുകളും ഇളകി വീണു. ബുധനാഴ്ച രാത്രി 11ന് ആണ് സംഭവം. 3 വർഷത്തിനിടെ മൂന്നാം തവണയാണ് ഇവിടെ മിന്നലേൽക്കുന്നതെന്ന് അൻസർ പറഞ്ഞു. ഒരിക്കൽ പറമ്പിലെ തെങ്ങ് മിന്നലേറ്റ് പല കഷണങ്ങളായി ഒടിഞ്ഞു വീണു. ഇങ്ങനെ ഒരേ സ്ഥലത്ത് ഇത്തരത്തിൽ മിന്നലേൽക്കുന്നത് പരിശോധിക്കണമെന്നും അൻസർ പറഞ്ഞു. മംഗലപുരം പഞ്ചായത്ത് എഇ, വില്ലേജ് ഓഫീസർ തുടങ്ങിയവർ സ്ഥലത്തെത്തി. എന്തുമാത്രം നാശനഷ്ടമുണ്ടായി എന്നത് കണക്കാക്കി വരുന്നതേയുള്ളൂ.
