രാമപുരം യുപി സ്കൂൾ ക്ലാസ്മുറികളിൽ വരെ തെരുവുനായ്ക്കൾ!

നെടുമങ്ങാട് ∙ വേങ്കവിള രാമപുരം ഗവ. യുപിഎസിൽ തെരുവുനായ്ക്കളുടെ ശല്യം രൂക്ഷം. പത്തിലധികം നായ്ക്കൾ സ്കൂൾ വളപ്പിൽ അലഞ്ഞുതിരിയുകയാണ്. ക്ലാസിനുള്ളിൽ വരെ ഇവ മലമൂത്ര വിസർജനം നടത്തുന്നു. ഇതു വൃത്തിയാക്കുകയാണ് രാവിലെ എത്തുന്ന അധ്യാപകരുടെയും രക്ഷിതാക്കളുടെയും ജോലി.  കുട്ടികളുടെ ശുചിമുറിക്ക് പുറത്ത് നായ്ക്കൾ കുട്ടികളുമായി കിടക്കുന്നു.

അധ്യാപകരും രക്ഷിതാക്കളും ഇവയെ ഓടിച്ചു വിടുന്നത് കെ‌ാണ്ടാണ് സ്കൂൾ കുട്ടികൾ കടിയേൽക്കാതെ രക്ഷപ്പെടുന്നത്. പഞ്ചായത്ത് ഓഫിസിനു മുന്നിൽ ഇതിനെക്കാൾ നായകൾ ഉണ്ടെന്ന് അറിയിച്ച് പഞ്ചായത്ത് അധികൃതർ വിഷയത്തിൽനിന്ന് ഒഴിഞ്ഞു മാറുകയാണെന്നും രക്ഷിതാക്കൾ പറഞ്ഞു. അധികൃതർ ഇടപെട്ട് പ്രശ്നത്തിന് പരിഹാരം കാണണമെന്ന് രക്ഷിതാക്കൾ ആവശ്യപ്പെട്ടു.