എലിവേറ്റഡ് ഹൈവേ അടിപ്പാതയിൽ അപകടം: 4 വാഹനങ്ങൾ കൂട്ടിയിടിച്ചു

കഴക്കൂട്ടം∙എലിവേറ്റഡ് ഹൈവേ അടിപ്പാതയിൽ പൊലീസ് ജീപ്പ് ഉൾപ്പെടെ 4 വാഹനങ്ങൾ കൂട്ടിയിടിച്ചു. കാറിലുണ്ടായിരുന്ന 2 പേർക്ക് പരുക്ക്. അപകടത്തെ തുടർന്ന് 45 മിനിറ്റോളം ഗതാഗതം തടസ്സപ്പെട്ടു. കഴക്കൂട്ടം ജംക്‌ഷനു സമീപം ശനിയാഴ്ച രാത്രി 8.30ന് ആണ് അപകടം. ശ്രീകാര്യം ഭാഗത്തു നിന്നു വന്ന കാർ നിയന്ത്രണം വിട്ട് സർവീസ് റോഡു വഴി വന്ന കാറിലിടിച്ചു. ഇടിച്ച കാറുകൾ നിയന്ത്രണം വിട്ട് സ്റ്റേഷനിൽ നിർത്തിയിട്ടിരുന്ന പൊലീസ് ജീപ്പിലും മറ്റൊരു കാറിലും ഇടിച്ചു നിന്നു. പരുക്കേറ്റവരെ സ്വകാര്യ ആശുപത്രിയിൽ എത്തിച്ച് പ്രാഥമിക ചികിത്സ നൽകി വിട്ടയച്ചു.