മീനാക്ഷി പാലത്ത് റസ്റ്ററന്റിന് തീയിട്ടു

മേപ്പാടി ∙ ചൂരൽമല റോഡിൽ മീനാക്ഷി പാലത്തിന് സമീപം റസ്റ്ററന്റ് കത്തിനശിച്ചു. ഒരാൾ റസ്റ്ററന്റിന് തീയിടുന്നത് സിസിടിവി ദൃശ്യങ്ങളിൽ പതിഞ്ഞിട്ടുണ്ട്. ആളെ തിരിച്ചറിഞ്ഞ മേപ്പാടി പൊലീസ് അന്വേഷണം ഉൗർജിതമാക്കി. റസ്റ്ററന്റ് പൂർണമായും കത്തിനശിച്ചു. വെള്ളിയാഴ്ച അർധരാത്രിയിലാണ് സംഭവം. പുല്ല് മേഞ്ഞ റസ്റ്ററന്റാണ് കത്തിനശിച്ചത്. 2 ജീവനക്കാർ റസ്റ്ററന്റിനുള്ളിലുണ്ടായിരുന്നു. തീ ആളിപ്പടരുന്നത് കണ്ട ഇവർ ഓടി രക്ഷപ്പെട്ടു. 

ഇവരുടെ 3 മൊബൈൽ ഫോണുകളും വസ്ത്രങ്ങളും റസ്റ്റോറന്റിലെ സാധനങ്ങളും ഉൾപ്പടെ കത്തിനശിച്ചു. ഏകദേശം 3 ലക്ഷം രൂപയുടെ നഷ്ടം കണക്കാക്കുന്നതായി ഉടമ പറഞ്ഞു. തൊള്ളായിരം കണ്ടിയിലേക്ക് സർവീസ് നടത്തുന്ന ജീപ്പുകളുടെ പാർക്കിങ് സ്ഥലത്താണ് റസ്റ്ററന്റ് പ്രവർത്തിച്ചിരുന്നത്.