ഹാവൂ, സ്കൂൾ റോഡ് പണി പൂർത്തിയായി
Mail This Article
പനമരം ∙ ഏറെ വിവാദങ്ങൾക്കും സമരങ്ങൾക്കും ഒടുവിൽ ഗവ.ഹയർ സെക്കൻഡറി സ്കൂൾ റോഡിന്റെ നിർമാണ പ്രവൃത്തികൾ പൂർത്തിയായി. റോഡിന്റെ ശോച്യാവസ്ഥയ്ക്കെതിരെ വ്യാപക പ്രതിഷേധം ഉയരുകയും വാർത്തയാകുകയും ചെയ്തതിനെ തുടർന്ന് 10 ലക്ഷം രൂപ വകയിരുത്തി റോഡ് ഉയർത്തി കോൺക്രീറ്റ് ചെയ്യുന്നതടക്കമുള്ള പ്രവൃത്തികൾ ആരംഭിച്ചിരുന്നു.
എന്നാൽ ചിലരുടെ ഇടപെടലിനെ തുടർന്ന് പണി പാതിയിൽ നിലയ്ക്കുന്ന അവസ്ഥ ഉണ്ടായതോടെ കോൺക്രീറ്റ് പ്രവൃത്തികൾ മനഃപൂർവം വൈകിപ്പിക്കുകയാണെന്ന് ആരോപിച്ച് പഞ്ചായത്തംഗം തന്നെ സമരവുമായി രംഗത്തിറങ്ങി. അസി.എൻജിനീയറുടെ ഓഫിസിനു മുൻപിൽ കുത്തിയിരിപ്പുസമരം നടത്തിയായിരുന്നു പ്രതിഷേധം.
ഇതിനു പിന്നാലെയാണ് നിർമാണപ്രവൃത്തികൾ അതിവേഗം പൂർത്തീകരിച്ചത്. നിർമാണം പൂർത്തീകരിച്ച റോഡ് കഴിഞ്ഞദിവസം പഞ്ചായത്തംഗം സുനിൽകുമാർ ഉദ്ഘാടനം ചെയ്തു. പഞ്ചായത്ത് സ്ഥിര സമിതി അധ്യക്ഷൻ കെ.ടി.സുബൈർ അധ്യക്ഷത വഹിച്ചു. പ്രിൻസിപ്പൽ രമേശ് കുമാർ, പ്രധാനാധ്യാപിക ഷീജ ജയിംസ്, മെഡിക്കൽ ഓഫിസർ കെ.വത്സ, അസീസ് കുനിയിൽ, കെ.സി.യൂസഫ്, കോവ ഷാജി എന്നിവർ പ്രസംഗിച്ചു.