അമിതവേഗത്തിൽ വന്ന വാഹനമിടിച്ച് മരണം; പൊലീസ് ഉദ്യോഗസ്ഥന് കണ്ണീരിൽ കുതിർന്ന യാത്രാമൊഴി

അൽ ഐൻ ∙ ഗതാഗതം നിയന്ത്രിക്കുന്നതിനിടെ ചീറിപ്പാഞ്ഞെത്തിയ വാഹനമിടിച്ച് മരിച്ച പൊലീസ് ഉദ്യോഗസ്ഥന് കണ്ണീരിൽ കുതിർന്ന യാത്രാമൊഴി. അൽഐൻ നിവാസികളും ഉന്നത പൊലീസുകാരും പ്രാർഥനാപൂർവം മരണാനന്തര ചടങ്ങുകളിൽ പങ്കെടുത്തു. തലസ്ഥാന പൊലീസിലെ പട്രോളിങ് വിഭാഗത്തിലെ ഉദ്യോഗസ്ഥൻ അലി സഈദ് ഖർബാശ് അസ്സഈദിക്കാണ് ഔദ്യോഗിക കൃത്യം നിർവഹിക്കുന്നതിനിടെ ദാരുണ അന്ത്യം സംഭവിച്ചത്. ട്രാഫിക് നിയമങ്ങൾ ലംഘിച്ച് ചീറിപ്പാഞ്ഞ വാഹനം അലിയെ ഇടിക്കുകയായിരുന്നു.

അൽഐനിലെ അൽഹലാമി തുരങ്ക പാതയ്ക്ക് അടുത്തുണ്ടായ വാഹനപകടത്തെ തുടർന്ന് ഗതാഗതം പൂർവ സ്ഥിതിയിലാക്കുന്നതിനിടെയാണ് അലിക്ക് ജീവാപായം വരുത്തിയ അപകടമുണ്ടായതെന്ന് അധികൃതർ അറിയിച്ചു. 

അൽഐനിലെ മസ്ജിദ് ശഹീദ് ഉമർ അൽ മിഖ്ബാലിയിൽ വൻ ജനാവലിയുടെ സാന്നിധ്യത്തിൽ മയ്യത്ത് നമസ്കാരം നടന്നു. നമസ്കാരാനന്തരം ഉമ്മു ഗാഫ ഖബർസ്ഥാനിൽ മൃതദേഹം ഖബറടക്കി. അബുദാബി പൊലീസ് സെൻട്രൽ ഓപ്പറേഷൻ ഡയറക്ടർ ബ്രിഗേ.സുഹൈൽ അൽഖുയയ്ലി ഹെഡ്ക്വോട്ടേഴ്സ് അഫേഴ്സ് ഡയറക്ടർ ബ്രിഗേ.നാസിർ അൽ യബ്ഹൂനി, പട്രോളിങ് ഡയറക്ടർ ബ്രിഗേ. സാലിം ബറാക് അൽ ദാഹിരി തുടങ്ങിയവർ മരണാനന്തരചടങ്ങുകളിൽ പങ്കെടുത്തു.

English Summary: Reckless driver kills police officer on duty in Al Ain