ദിവസവും കണ്ട് ആസ്വദിക്കാം, ഹമദ് തുറമുഖ കാഴ്ചകൾ

ദോഹ∙ പൊതുജനങ്ങൾക്ക് ഹമദ് തുറമുഖത്തെ കാഴ്ച കാണാൻ അവസരമൊരുക്കി സന്ദർശന കേന്ദ്രത്തിന്റെ പ്രവർത്തനം ആഴ്ചയിൽ 7 ദിവസമാക്കി. ഈദ് അവധി ദിനങ്ങളിൽ തിരക്കേറിയതോടെയാണ് സന്ദർശക കേന്ദ്രത്തിന്റെ പ്രവർത്തനം എല്ലാ ദിവസവുമാക്കിയത്.

ശനി മുതൽ വ്യാഴം വരെ രാവിലെ 8 മുതൽ രാത്രി 7 വരെയും വെള്ളിയാഴ്ചകളിൽ ഉച്ചയ്ക്ക് ഒന്നു മുതൽ രാത്രി 7 വരെയുമാണ് പ്രവേശനം. മവാനി ഖത്തറിന്റ https://visitorscenter.mwani.com.qa/ എന്ന വെബ്‌സൈറ്റ് മുഖേന മുൻകൂട്ടി ബുക്ക് ചെയ്യണം. വെബ്‌സൈറ്റിൽ പ്രവേശിച്ച് അക്കൗണ്ട് ക്രിയേറ്റ് ചെയ്ത് റജിസ്റ്റർ ചെയ്ത ശേഷം ടിക്കറ്റ് ബുക്ക് ചെയ്യാം.

13 വയസ്സിന് മുകളിലുള്ളവർക്ക് 50 റിയാൽ, 5– 12  പ്രായക്കാർക്ക് 30 റിയാലുമാണ് നിരക്ക്. 5 വയസ്സിൽ താഴെയുള്ളവർക്ക് പ്രവേശനം സൗജന്യം. സന്ദർശകർക്കായി ഹമദ് തുറമുഖത്ത് വൈവിധ്യമായ കാഴ്ചകളാണുള്ളത്.

സമുദ്ര പൈതൃകവും നേട്ടങ്ങളും പ്രദർശിപ്പിച്ച റിക്രിയേഷൻ സമുച്ചയം, രാജ്യത്തിന്റെ പ്രഥമ ഓഷ്യാനിക് അക്വേറിയം, സമുദ്ര മ്യൂസിയം, 4 ഡി സിനിമ, കുട്ടികൾക്കായി പ്രത്യേക കളിസ്ഥലം എന്നിവയ്‌ക്കെല്ലാം പുറമെ അത്യാധുനിക സാങ്കേതിക ഉപകരണങ്ങളും ഇന്ററാക്ടീവ് സിമുലേറ്ററുകളുള്ള മൾട്ടിപർപ്പസ് ഹാളുമുണ്ട്. ദോഹയിൽ നിന്ന് മിസൈദ് റോഡിലൂടെ ഉം അൽ ഹൗലിലെ ഹമദ് തുറമുഖ സന്ദർശക കേന്ദ്രത്തിലെത്താം. ദൂരം 35 കിമീ.

English Summary: Hamad Port visitors centre now open 7 Days in a week.