എന്തിന് വെറുതെ – ശ്രീപദം എഴുതിയ കവിത

എന്തിന് വെറുതെ...

നീ പോയപ്പോളെന്തിനാണെന്റെ

കരൾ പിടഞ്ഞതുമടർന്നു വീണതും..

ശ്വാസങ്ങളൊക്കെയും നിശ്വാസമായതും.

നീൾമുനകൾ നീട്ടിയെൻ മിഴികൾ

നിൻ നേർക്ക് പാഞ്ഞതും...

ബന്ധനം ഭേദിച്ചൊരശ്വമായെന്മനം 

നിന്നിലേക്ക് കുതിച്ചതും..
 

നീ വരാതെയൊന്നുമിനി 

ഉരിയാടില്ലെന്നുറച്ചെന്റെ 

ചുണ്ടുകൾ വിറകൊള്ളുന്നിതിപ്പോഴും...

വിണ്ടുകീറിയൊരെന്മനപ്പാടത്ത്

ഒരു പേമാരിയായ് പെയ്തു തീരട്ടെ 

നിന്നോർമ്മകളെന്നിലെന്നുമെന്നും...