പ്രായോഗിക കാമുകൻ – എല്ലെസ് അശോക് എഴുതിയ കവിത

വീണപൂവിന്റെ കാതോരം ചേർന്നങ്ങു

കാമുകൻ വണ്ടൊരു കാര്യമോതി.

ഹാ -പ്രിയ പ്രണയ വീണപുഷ്‌പമേ, 

"അധികതുംഗപദത്തിലെത്ര നാൾ

ശോഭിച്ചിരുന്നിതൊരു രാജ്ഞി കണക്കെ നീ!"
 

നിന്നിൽ പക്ഷേ മധുകണിക തരി

പോലുമിന്നില്ലെനിക്കു നുകരുവാൻ. 

ക്ഷണിപ്പതുണ്ടെന്നെയൊരുപാടുപേർ

വീഴാത്ത; യൗവ്വനം ചോരാത്ത പൂവുകൾ.
 

നിനക്കായ് ഞാനെന്തിനായിനി

പാഴാക്കണമെന്റെ നല്ല ജൻമം. 

ഒരുപരാഗണത്തിനിനിയുമാവതില്ല

നിനക്കെന്നറിയുന്നു സത്യമല്ലേ!
 

തേടട്ടെ ഞാനൊന്ന്, നുകരട്ടെ തേൻ

പ്രണയഗന്ധ ഭരിതയായ് വിലസിടും

പൂമ്പൊടി നിറയുന്ന വർണ്ണാഭയാർന്നൊരു

വീഴാത്ത; മധുവൊത്ത പൂവിനെത്തന്നെ!
 

(രണ്ടു വരികൾ കടപ്പാട് - കുമാരനാശാൻ)