തീക്കളി – വേണു നമ്പ്യാർ എഴുതിയ കവിത

ഉടനീളം തീക്കളി

കനലോട്ടം നിനക്കെങ്കിൽ

കനൽചാട്ടമെനിക്ക്
 

നിനക്ക് പൊള്ളലേറ്റാൽ

പേടിക്കേണ്ട

ഞാൻ നിന്റെ ലേപനം
 

എനിക്ക് പൊള്ളലേറ്റാൽ

ഞാൻ നിലവിളിക്കില്ല

പകരം നിന്നെ സൗമ്യമായ് വിളിക്കും

നീയെന്റെ ലേപനം
 

പൊള്ളലുണങ്ങാനെടുക്കുന്ന

അവധിയിൽ പൊള്ളൽ പൊതിഞ്ഞു

കെട്ടി നമുക്ക് പുഴയുടെ അടിത്തട്ടിൽ

കക്ക വാരി കളിക്കാം
 

അറ്റ തീക്കളിക്ക് ലേപനമൊന്നും 

ഗുണം ചെയ്യില്ല

കണ്ണുനീർത്തുള്ളി വിശേഷപ്പെട്ടതും 

ദുർലഭവും 

തെറ്റിദ്ധരിക്കപ്പെട്ടതുമായ ഒറ്റമൂലി
 

തീയോളം വരില്ല തീയിലിട്ടത്

പ്രണയത്തിന്റെ 

പുകച്ചുരുളുകൾ

ആലസ്യത്തോടെ

കോടമഞ്ഞിൽ അമരും
 

തീനാളങ്ങളുടെ

ഭാഷയിൽ നമ്മളെഴുതിയ

പ്രണയ കവിതകൾ 

ലോകം വിസ്മരിക്കും.