പാട്ടോളങ്ങളിൽ മുങ്ങിനിവരാൻ തലസ്ഥാനം; ചലച്ചിത്രോത്സവത്തിൽ പാട്ടിന്റെ മഹാമേള
![thaal-tarang thaal-tarang](https://img-mm.manoramaonline.com/content/dam/mm/mo/music/music-news/images/2023/12/8/thaal-tarang.jpg?w=1120&h=583)
Mail This Article
രാജ്യാന്തര ചലച്ചിത്ര മേളയ്ക്കു കൊഴുപ്പേകാൻ നാടന് പാട്ടുകള് മുതല് പോപ് സംഗീത സന്ധ്യ വരെ അരങ്ങേറും. അഭയ ഹിരണ്മയി ഉള്പ്പെടെയുള്ള ഗായകരും പ്രമുഖ സംഗീത ബാന്ഡുകളുമാണ് ചലച്ചിത്ര രാവുകള്ക്ക് ഉത്സവഛായയേകാന് സാംസ്കാരിക പരിപാടികളുമായി എത്തുന്നത്. മേളയുടെ ഉദ്ഘാടനത്തോടനുബന്ധിച്ച് വെള്ളിയാഴ്ച വൈകിട്ട് 5ന് നിശാഗന്ധിയിൽ സ്ത്രീ താൾ തരംഗിന്റെ ഗാന സന്ധ്യയോടെയാണ് തുടക്കം.
സ്ത്രീകള് നയിക്കുന്ന താളവാദ്യ സംഘമായ സ്ത്രീ താള് തരംഗിന് സുകന്യ രാംഗോപാലാണ് നേതൃത്വം നൽകുന്നത്. വാദ്യമേളത്തോടെ കനകക്കുന്ന് നിശാഗന്ധി ഓഡിറ്റോറിയത്തില് ഉദ്ഘാടന ചടങ്ങിന് തുടക്കമാകും. ഘടം, ഘടതരംഗം, കൊന്നക്കോല് എന്നിവയ്ക്കൊപ്പം വീണ, വയലിന്, മൃദംഗം, മോര്സിങ് തുടങ്ങിയ വാദ്യോപകരണ വിദഗ്ധരും ഈ സംഗീത സന്ധ്യക്ക് അകമ്പടിയേകും.
ഡിസംബർ ഒൻപതു മുതൽ മാനവീയം വീഥിയിലാണ് വൈകിട്ട് ഏഴിന് കലാപരിപാടികൾ അരങ്ങേറുന്നത്. അഭയ ഹിരണ്മയിയും ഷിയോണ് സജിയും സംഗീത ബാന്ഡുകളായ ഫ്ളൈയിങ് എലിഫന്റ്, രാഗവല്ലി, മാങ്കോസ്റ്റീന് ക്ലബ്, ഇഷ്ക് സൂഫിയാന എന്നിവയും മാനവീയത്തെ പാട്ടിലാക്കാനെത്തും.
അഭയ ഹിരണ്മയി അവതരിപ്പിക്കുന്ന പിക്കിൾ ജാർ ഗാനസന്ധ്യ ഡിസംബര് 9ന് മാനവീയം വീഥിയില് അരങ്ങേറും. പാട്ടുകള്കൊണ്ട് ത്രസിപ്പിക്കുന്ന ഒരു കൂട്ടം ചെറുപ്പക്കാരുടെ ഫ്ളൈയിങ് എലിഫന്റ് മ്യൂസിക് ബാന്ഡും ചെമ്പൈ മെമ്മോറിയല് സംഗീത കോളജിലെ വിദ്യാർഥി കൂട്ടായ്മയുടെ രാഗവല്ലി മ്യൂസിക് ബാന്ഡും കോഴിക്കോട് ആസ്ഥാനമായുള്ള ഇന്ഡി മ്യൂസിക് ബാന്ഡായ മാംഗോസ്റ്റീന് ക്ലബും ഷിയോണ് സജി മ്യൂസിക് ലൈവുമാണ് തുടര്ന്നുള്ള ദിവസങ്ങളില് സംഗീതവിരുന്നൊരുക്കുക.
ഡിസംബര് 15ന് വൈകുന്നേരം 5 മണിക്ക് നിശാഗന്ധി ഓഡിറ്റോറിയത്തില് അഖില് മാവേലിക്കരയും സംഘവും അവതരിപ്പിക്കുന്ന പരമ്പരാഗത ഉപകരണങ്ങള് ഉപയോഗിച്ചുള്ള ഫ്യൂഷന് സംഗീതസന്ധ്യയോടെ ചലച്ചിത്ര മേളയ്ക്കു തിരശ്ശീല വീഴും.