പ്രണയഗാനവുമായി ‘മനോരാജ്യം’; ഏറ്റെടുത്ത് പ്രേക്ഷകർ

‘മനോരാജ്യം’ എന്ന ചിത്രത്തിലെ പുതിയ ഗാനം ഏറ്റെടുത്ത് പ്രേക്ഷകർ. ‘ഇരുൾ നീങ്ങിയോ’ എന്നു തുടങ്ങുന്ന പാട്ടിന്റെ ലിറിക്കൽ വിഡിയോ ആണ് അണിയറപ്രവർത്തകർ പുറത്തിറക്കിയത്. റഷീദ് പാറയ്ക്കൽ പാട്ടിനു വരികൾ കുറിച്ചു. യൂനസ് ഈണമൊരുക്കിയ ഗാനം ഹരിചരൺ ആലപിച്ചു. 

പാട്ട് ഇതിനകം ശ്രദ്ധേയമായിക്കഴിഞ്ഞു. നിരവധി പേരാണു പ്രതികരണങ്ങൾ അറിയിക്കുന്നത്. ചിത്രത്തിലെ നേരത്തേ പുറത്തിറങ്ങിയ ‘തെളിവാനമേ’, ‘തൂവലായ്’, ‘നിലാവിന്റെ’, ‘നാലുപാടിലും’ എന്നീ ഗാനങ്ങളും ഏറെ ശ്രദ്ധിക്കപ്പെട്ടിരുന്നു.

റഷീദ് പാറയ്ക്കൽ രചനയും സംവിധാനവും നിർവഹിച്ച ചിത്രമാണ് ‘മനോരാജ്യം’. ഗോവിന്ദ് പത്മസൂര്യ (ജിപി) നായകനായെത്തുന്നു. രഞ്ജിത മേനോൻ ആണ് ജിപിയുടെ നായിക.