ഹരിയാന നിയമസഭാ തിരഞ്ഞെടുപ്പ്: ഉൾപാർട്ടിപ്പോര് ബിജെപിയിൽ, രാഹുൽ മാതൃകയെന്ന് ഭൂപീന്ദർ ഹൂഡ

ഹരിയാന ബിജെപിക്കുള്ളിൽ 6 പ്രബല ഗ്രൂപ്പുകളുണ്ടെന്നും അവർ നേരിടുന്നത് വലിയ വെല്ലുവിളിയാണെന്നും കോൺഗ്രസ് നേതാവും മുൻ മുഖ്യമന്ത്രിയുമായ ഭൂപീന്ദർ സിങ് ഹൂഡ പറഞ്ഞു. കോൺഗ്രസിൽ തമ്മിലടിയില്ലെന്നും ‘ദ് വീക്കിന്’ അനുവദിച്ച അഭിമുഖത്തിൽ ഹൂഡ പറഞ്ഞു. 

∙ മുഖ്യമന്ത്രി സ്ഥാനാർഥിയാകുമോ? മകൻ ദീപേന്ദർ ഹൂഡയ്ക്ക് സാധ്യതയുണ്ടോ?

തീരുമാനം ജനങ്ങളുടേതാണ്. അവർ എംഎൽഎമാരെ തിരഞ്ഞെടുക്കും. എംഎൽഎമാരും ഹൈക്കമാൻഡും ചേർന്നും മുഖ്യമന്ത്രിയേയും.

∙ കോൺഗ്രസിൽ കടുത്ത വിഭാഗീയതയെന്ന പ്രതീതിയുണ്ട്. കുമാരി ഷെൽജയും രൺദീപ് സിങ് സുർജേവാലയും പ്രത്യേകം റാലികളും നടത്തിയല്ലോ?

ഓരോ കോ‍ൺഗ്രസ് നേതാവും അവരവരുടെ നിലയിൽ പാർട്ടിയെ ശക്തിപ്പെടുത്താൻ ശ്രമിക്കുന്നതിനെ തമ്മിലടിയായി കാണുന്നത് എന്തിനാണ്? തമ്മിലടി ബിജെപിയിലാണ്.

∙ ജെജെപി, ഐഎൻഎൽഡി, ആംആദ്മി പാർട്ടികൾ വോട്ട് ഭിന്നിപ്പിക്കില്ലേ?

ഇവിടെ കോൺഗ്രസും ബിജെപിയും തമ്മിലാണ് മത്സരം. ഐഎ‍ൻഎൽഡിയും ജെജെപിയുമെല്ലാം നേരിട്ടോ അല്ലാതെയോ ബിജെപിയുടെ സഖ്യകക്ഷികളാണ്. ജനം അവരെ പാഠം പഠിപ്പിക്കും.