സീറ്റിന് പണം: കേന്ദ്രമന്ത്രി പ്രഹ്ലാദ് ജോഷിയുടെ സഹോദരൻ അറസ്റ്റിൽ

ബെംഗളൂരു ∙ ലോക്സഭാ തിരഞ്ഞെടുപ്പിൽ ബിജെപി സീറ്റ് വാഗ്ദാനം ചെയ്ത് 2 കോടി രൂപ തട്ടിയെന്ന കേസിൽ കേന്ദ്രമന്ത്രി പ്രഹ്ലാദ് ജോഷിയുടെ സഹോദരൻ ഗോപാൽ ജോഷിയെയും ഇയാളുടെ മകൻ അജയ് ജോഷിയെയും മഹാരാഷ്ട്രയിൽ അറസ്റ്റ് ചെയ്തു. ഇന്നു ബെംഗളൂരുവിലെത്തിക്കും. കേന്ദ്രമന്ത്രിയുടെ സഹോദരി വിജയലക്ഷ്മിയാണെന്നു കള്ളംപറഞ്ഞ് തട്ടിപ്പിനു കൂട്ടുനിന്ന വിജയകുമാരി ഉൾപ്പെടെ 3 പേർ നേരത്തേ അറസ്റ്റിലായിരുന്നു. വിജയപുര നാഗത്താന മുൻ എംഎൽഎ ദേവാനന്ദ് ഫൂൽസിങ് ചവാന്റെ ഭാര്യ സുനിതയാണ് പരാതി നൽകിയത്. സീറ്റിനായി ഗോപാൽ 5 കോടി രൂപ ആവശ്യപ്പെട്ടെന്നും വിജയകുമാരിക്ക് 2 കോടി രൂപ കൈമാറിയെന്നും പരാതിയിൽ പറയുന്നു.