ക്ലൈമാക്സിൽ രാഹുൽ; ആവേശത്തിൽ യുഡിഎഫ്

തിരുവനന്തപുരം ∙ പരസ്യപ്രചാരണത്തിന്റെ അവസാന മണിക്കൂറിൽ യുഡിഎഫിന് ആവേശമായി കോൺഗ്രസ് നേതാവ് രാഹുൽ ഗാന്ധി ഇന്നു വീണ്ടും തലസ്ഥാനത്ത്. സംസ്ഥാനത്ത് ഏറ്റവും ശ്രദ്ധേയമായ പോരാട്ടം നടക്കുന്ന നേമം മണ്ഡലത്തിൽ കെ. മുരളീധരന് വോട്ടു തേടിയാണ് രാഹുൽ എത്തുന്നത്. വൈകിട്ട് 4.30ന് പൂജപ്പുര മൈതാനത്തു നടക്കുന്ന സമ്മേളനത്തിൽ അദ്ദേഹം പ്രസംഗിക്കും. 

കണ്ണൂരിൽ തങ്ങുന്ന രാഹുൽ ഇന്നു വയനാട്ടിലും കോഴിക്കോട്ടും പ്രചാരണ പരിപാടികളിൽ പങ്കെടുത്ത ശേഷമാണു തിരുവനന്തപുരത്ത് എത്തുക. 6.30ന് ഡൽഹിക്കു മടങ്ങും. എഐസിസി ജനറൽ സെക്രട്ടറി പ്രിയങ്ക ഗാന്ധി ഇന്നലെ നേമത്തു നിശ്ചയിച്ചിരുന്ന പ്രചാരണം കോവിഡ് നിരീക്ഷണത്തിലായതിനെ തുടർന്ന് ഉപേക്ഷിക്കേണ്ടി വന്നതിനാലാണ് പകരം രാഹുൽ എത്തുന്നത്.