ദുരിതകാലത്ത് ആഘോഷമോ? ദുരിതം ഒരാളുടേതെങ്കിലും മുൻഗണന അതിന്: സർക്കാരിനോട് ഹൈക്കോടതി

കൊച്ചി ∙ ജനം ദുരിതത്തിലാണ്ടുനിൽക്കുമ്പോൾ സർക്കാർ ആഘോഷങ്ങളിൽ മുഴുകുന്നതു പ്രതീക്ഷിക്കാവുന്നതല്ലെന്നു ഹൈക്കോടതി. കേരളം പോലെയുള്ള സംസ്ഥാനത്തു ഭരണനിർവഹണം നടത്തുമ്പോൾ അധികൃതർ ഇക്കാര്യം മനസ്സിൽ വയ്ക്കണം. ദുരിതം ഒരാളുടേതാണെങ്കിൽ പോലും മുൻഗണന നൽകേണ്ടത് അതിനാണെന്നു ജസ്റ്റിസ് ദേവൻ രാമചന്ദ്രൻ പറഞ്ഞു.

കെഎസ്ആർടിസി ജീവനക്കാരുടെ പെൻഷൻ വൈകുന്നതു സംബന്ധിച്ച കോടതിയലക്ഷ്യക്കേസിൽ, പണമില്ലാത്ത അവസ്ഥ ചീഫ് സെക്രട്ടറി ചൂണ്ടിക്കാട്ടിയപ്പോഴായിരുന്നു കോടതിയുടെ പരാമർശം. കോടതിയുടെ നിർദേശപ്രകാരം ചീഫ് സെക്രട്ടറി ഡോ.വി.വേണുവും ഗതാഗത സെക്രട്ടറി ബിജു പ്രഭാകറും ഓൺലൈനിൽ ഹാജരായി.