ഐഎഫ്എഫ്കെ: റജിസ്‌ട്രേഷൻ ഇന്നു മുതൽ

തിരുവനന്തപുരം∙ ഡിസംബർ 8 മുതൽ 15 വരെ തിരുവനന്തപുരത്തു നടക്കുന്ന കേരള രാജ്യാന്തര ചലച്ചിത്രമേളയുടെ (ഐഎഫ്എഫ്കെ) ഡെലിഗേറ്റ് റജിസ്‌ട്രേഷൻ ഇന്നു രാവിലെ 10 നു തുടങ്ങും. വെബ്സൈറ്റ്: www.iffk.in. ഫീസ്: പൊതുവിഭാഗം 1180 രൂപ; വിദ്യാർഥികൾക്ക് 590 രൂപ. മുഖ്യവേദിയായ ടഗോർ തിയറ്ററിലെ ഡെലിഗേറ്റ് സെൽ മുഖേന നേരിട്ടും റജിസ്‌ട്രേഷൻ നടത്താം.

മേളയിൽ വിവിധ രാജ്യങ്ങളിൽനിന്നുള്ള ഏകദേശം 180 ചിത്രങ്ങൾ 15 തിയറ്ററുകളിലായി പ്രദർശിപ്പിക്കും. ഏഷ്യൻ, ആഫ്രിക്കൻ, ലാറ്റിനമേരിക്കൻ രാജ്യങ്ങളിൽനിന്നുള്ള സിനിമകളുടെ രാജ്യാന്തര മത്സര വിഭാഗം, സമകാലിക ചലച്ചിത്രാചാര്യന്മാരുടെ ഏറ്റവും പുതിയ സിനിമകൾ, മുൻനിര ചലച്ചിത്രമേളകളിൽ അംഗീകാരങ്ങൾ നേടിയ സിനിമകൾ എന്നിവ ഉൾപ്പെടുന്ന ലോക സിനിമാ വിഭാഗം, ഇന്ത്യൻ സിനിമ നൗ, മലയാളം സിനിമ ടുഡേ, കൺട്രി ഫോക്കസ് വിഭാഗത്തിലുള്ള ക്യൂബൻ ചിത്രങ്ങൾ, മൺമറഞ്ഞ ചലച്ചിത്ര പ്രതിഭകൾക്കു സ്മരണാഞ്ജലിയർപ്പിക്കുന്ന ഹോമജ് വിഭാഗം തുടങ്ങിയവയുണ്ട്.