മണിപ്പുരിൽ അക്രമങ്ങൾക്ക് നേതൃത്വം നൽകിയവർ സൗഹൃദം നടിക്കുന്നു: പിണറായി
Mail This Article
കാക്കനാട്∙ മണിപ്പുരിൽ വംശഹത്യയുടെതിനു തുല്യമായ അക്രമങ്ങൾക്കു നേതൃത്വം നൽകിയവർ അതൊന്നും അറിഞ്ഞില്ലെന്ന നാട്യത്തോടെ സൗഹൃദം നടിക്കുകയാണെന്നു മുഖ്യമന്ത്രി പിണറായി വിജയൻ. നാലു വോട്ടിനു വേണ്ടി നടത്തുന്ന ഇത്തരം നീക്കങ്ങൾ എല്ലാവരും തിരിച്ചറിയുമെന്നു തൃക്കാക്കര മണ്ഡലത്തിലെ നവകേരള സദസ്സിൽ മുഖ്യമന്ത്രി പറഞ്ഞു.
മണിപ്പുർ ആക്രമണത്തിൽ ക്രൈസ്തവ സഭകൾ വലിയതോതിൽ പ്രതിഷേധം നടത്തേണ്ടി വന്നു. സാധാരണ ഇത്തരം പ്രതിഷേധങ്ങൾക്കൊന്നും സഭകൾ തയാറാകാറില്ല. ക്രൈസ്തവ വിശ്വാസം സ്വീകരിച്ചതിന്റെ പേരിൽ അവിടത്തുകാർ അനുഭവിച്ച കൊടുംക്രൂരത കണ്ടില്ലെന്നു നടിക്കാൻ സഭകൾക്കായില്ല. അവിടെ ആക്രമണത്തിനു നേതൃത്വം നൽകിയവർ ഇരകളോടുള്ള എല്ലാ ശത്രുതയും മനസ്സിൽ വച്ചു കൊണ്ട് ഇപ്പോൾ സൗഹൃദനീക്കം നടത്തുന്നുണ്ട്. വോട്ടിനു വേണ്ടിയുള്ള ഈ നീക്കം വിലപ്പോവില്ല - പിണറായി വിജയൻ പറഞ്ഞു.