വീടു വിട്ടുപോയ 2 പെൺകുട്ടികളെ ബസ് ജീവനക്കാർ രക്ഷിച്ചു

കുമളി∙ കെഎസ്ആർടിസി ബസിൽ കുമളിയിലേക്ക് വന്ന പ്രായപൂർത്തിയാകാത്ത 2 പെൺകുട്ടികളെ ബസ് ജീവനക്കാരും യാത്രക്കാരും ചേർന്ന് കുമളി പൊലീസിൽ ഏൽപിച്ചു. പൊലീസ് കുട്ടികളുടെ മാതാപിതാക്കളെ വിവരം അറിയിച്ചു. രാവിലെ സ്കൂളിൽ പോയ കുട്ടികൾ വീട്ടുകാരോടു പറയാതെ ബസിൽ കയറി കട്ടപ്പനയ്ക്ക് ടിക്കറ്റെടുത്തു. കട്ടപ്പനയിലിറങ്ങാതെ പിന്നീട് കുമളിക്ക് ടിക്കറ്റെടുത്തു. കുട്ടികളുടെ പെരുമാറ്റത്തിൽ സംശയം തോന്നിയ കണ്ടക്ടർ ബസിലെ സ്ഥിരം യാത്രക്കാരായ സർക്കാർ ജീവനക്കാരുമായി സംശയം പങ്കുവച്ചു. തുടർന്ന് കുമളി പൊലീസിൽ അറിയിച്ചു. ബസ് കുമളി സ്റ്റാൻഡിൽ എത്തിയപ്പോൾ കാത്തു നിന്നിരുന്ന പൊലീസുകാർ പെൺകുട്ടികളെ സ്റ്റേഷനിലേക്ക് കൂട്ടിക്കൊണ്ടു പോകുകയായിരുന്നു.