അൻവറിനോട് സിപിഐക്ക് ബന്ധമില്ല: ബിനോയ് വിശ്വം

തിരുവനന്തപുരം∙ പി.വി.അൻവറിന്റേതല്ല, തങ്ങളുടെ സ്വന്തം നിലപാടാണു സിപിഐ പറയുന്നതെന്നു സംസ്ഥാന സെക്രട്ടറി ബിനോയ് വിശ്വം.സിപിഐയുടെ രാഷ്ട്രീയം എൽഡിഎഫ് രാഷ്ട്രീയമാണ്. ഈ രാഷ്ട്രീയത്തിന്റെ മറുഭാഗത്തുള്ള ഒരു വഴിയും സിപിഐയുടേതല്ല. എൽഡിഎഫിന്റെ ആരുമല്ലാത്ത അൻവറിനോട് സിപിഐക്ക് ബന്ധമില്ല. ഉണ്ടാകാനും പാടില്ല. അൻവറിന്റെ രാഷ്ട്രീയവും വന്ന വഴികളും അറിയാം.

അൻവ‍ർ 2011 ൽ മത്സരിച്ചത് എൽഡിഎഫിന്റെ ഔദ്യോഗിക സ്ഥാനാർഥിയായ സിപിഐക്കാരനായ അഷ്റഫ് കാളിയത്തിന് എതിരെയാണ്. എഡിജിപിയുടെ മാറ്റം സംഭവിച്ചിരിക്കും. അത് എത്ര നാളായാലും സംഭവിക്കും. ഇക്കാര്യത്തിൽ സിപിഐയുടെ നിലപാട് വ്യക്തമാണ്. അത് എന്നുമെന്നും ആവർത്തിക്കേണ്ട കാര്യമില്ലെന്നും ബിനോയ് വിശ്വം പറഞ്ഞു.