ജോസഫ് ചതിയനെന്ന് കേരള കോൺഗ്രസ് (എം) മുഖപത്രത്തിൽ ലേഖനം

കോട്ടയം ∙ പി.ജെ.ജോസഫ് ചതിയനെന്നു വിമർശിച്ച് കേരള കോൺഗ്രസിന്റെ (എം) മുഖപത്രമായ ‘നവപ്രതിഛായ’യിൽ ലേഖനം. വിമാനയാത്രാ വിവാദത്തിൽ രാഷ്ട്രീയ ഭാവി അടഞ്ഞുപോകേണ്ടിയിരുന്ന ജോസഫിനെ രക്ഷിച്ചത് കെ.എം.മാണിയാണെന്നും പിന്നീടു ചതിയനായി മാറുന്ന ജോസഫിനെയാണു കേരളം കണ്ടതെന്നുമാണു കേരള കോൺഗ്രസ് (എം) ജനറൽ സെക്രട്ടറി സ്റ്റീഫൻ ജോർജിന്റെ ലേഖനത്തിലെ പരാമർശം.

വിവാദത്തിൽപെട്ട ജോസഫിനെ ചേർത്തുപിടിച്ച് കെ.എം.മാണി യുഡിഎഫിലേക്കു കൊണ്ടുവന്നു. ജോസഫ് ഗ്രൂപ്പിനെ യുഡിഎഫിലെടുക്കുന്നതിന്റെ ഗുണവും ദോഷവും കേരള കോൺഗ്രസ് (എം) തന്നെ അനുഭവിക്കേണ്ടി വരുമെന്ന് അന്നു കോൺഗ്രസ് നേതൃത്വം മുന്നറിയിപ്പു നൽകിയിരുന്നതായും ലേഖനത്തിൽ പറയുന്നു.

ബാർകോഴ വിവാദത്തിൽ കെ.എം.മാണി മന്ത്രിസ്ഥാനം രാജിവച്ചാൽ കൂടെ ജോസഫ് മന്ത്രിസ്ഥാനവും തോമസ് ഉണ്ണിയാടൻ ഗവ. ചീഫ് വിപ് സ്ഥാനവും രാജിവയ്ക്കണമെന്നു പാർട്ടിയിൽ ധാരണയുണ്ടായിരുന്നു. ഈ തീരുമാനം കാറ്റിൽപറത്തി ജോസഫ് ചതിച്ചെന്നും ലേഖനത്തിലുണ്ട്.