ആഗ്രഹം പോലെ അവയവദാനം: സനു ക്രിസ്റ്റോ ഇനിയും ജീവിക്കും...

അഞ്ചാലുംമൂട് (കൊല്ലം) ∙ 20 വർഷത്തിലേറെയായുള്ള പ്രവാസ ജീവിതത്തിനൊടുവിൽ മരണം കവർന്നെങ്കിലും മലയാളിയായ സനു ക്രിസ്റ്റോ ഇനിയും ജീവിക്കും, അവയവദാനത്തിലൂടെ. അബുദാബിയിലാണ് തൃക്കടവൂർ മതിലിൽ കൊച്ചുതൊടിയിൽ മിന്നാരത്തിൽ സനു ക്രിസ്റ്റോയുടെ (46) എട്ടോളം അവയവങ്ങൾ  ദാനം ചെയ്തത്. അബുദാബി ഷെയ്ഖ് ഷാഖ്ബൗട്ട് മെഡിക്കൽ സിറ്റി ആശുപത്രിയിലായിരുന്നു അവയവദാനം. 

 2 ദിവസം മുൻപ് അബുദാബിയിലെ താമസസ്ഥലത്തു നിന്നു ജോലിക്കു പോകാനായി ഇറങ്ങുന്നതിനിടെ പെട്ടെന്നു കുഴഞ്ഞു വീണ സനുവിനെ ആശുപത്രിയിലെത്തിച്ചെങ്കിലും രക്ഷിക്കാനായില്ല. സനുവിന്റെ ആഗ്രഹപ്രകാരം അവയവങ്ങൾ ദാനം ചെയ്യാൻ നടപടികൾ തുടങ്ങി. മൃതദേഹം ഇന്ന് നാട്ടിലെത്തിക്കും. തുടർന്നു വീട്ടിൽ പൊതുദർശനത്തിനു വച്ച ശേഷം സംസ്കാരം വൈകിട്ട് 5നു കടവൂർ സെന്റ് കസ്മീർ ദേവാലയത്തിൽ നടക്കും. ഭാര്യ ഷൈനി പ്രിയദർശിനി. മക്കൾ നൈറ, എലീഷ, മെലീസ.