‘ജനസംഖ്യ കുറഞ്ഞു; ഒന്നാം ക്ലാസിൽ കുട്ടികളും’: വിദ്യാഭ്യാസ വകുപ്പ്

തിരുവനന്തപുരം∙ സംസ്ഥാനത്തെ പൊതുവിദ്യാലയങ്ങളിൽ കുട്ടികളുടെ എണ്ണം കുറയുന്നതു സംബന്ധിച്ച വിലയിരുത്തലുകൾ വസ്തുതാപരമല്ലെന്നു പൊതുവിദ്യാഭ്യാസ വകുപ്പ്. ജനസംഖ്യ കുറയുന്നതിന് അനുസരിച്ചുള്ള കുറവ് മാത്രമാണ് ഒന്നാം ക്ലാസിൽ ചേരുന്ന കുട്ടികളുടെ എണ്ണത്തിലും പ്രതിഫലിക്കുന്നതെന്നും 2 മുതൽ 10 വരെ ക്ലാസുകളിൽ ഈ അധ്യയന വർഷം കൂടുതൽ കുട്ടികൾ പൊതുവിദ്യാലയങ്ങളിലേക്ക് എത്തിയെന്നും മന്ത്രി വി.ശിവൻകുട്ടി വ്യക്തമാക്കി. അടിസ്ഥാനസൗകര്യ വികസനമുണ്ടായിട്ടും പൊതുവിദ്യാലയങ്ങളിൽ കുട്ടികൾ കുറയുന്നതിന്റെ കാരണം വ്യക്തമാക്കി റിപ്പോർട്ട് നൽ‌കാൻ സംസ്ഥാന ബാലാവകാശ കമ്മിഷൻ പൊതുവിദ്യാഭ്യാസ വകുപ്പിനോട് ഉത്തരവിട്ടിരുന്നു. ഈ സാഹചര്യത്തിലാണ് വിശദീകരണം. 

‘2019 ൽ ജനിച്ച കുട്ടികളാണ് ഈ വർഷം ഒന്നാം ക്ലാസിൽ ചേർന്നത്. 2009 ൽ സംസ്ഥാനത്ത് റജിസ്റ്റർ ചെയ്ത ജനനം 5.5 ലക്ഷം ആയിരുന്നെങ്കിൽ 2019ൽ അത് 4.8 ലക്ഷമായി. 10 വർഷം കൊണ്ട് 70,000 കുട്ടികളുടെ കുറവാണ് വാർഷിക കണക്കിൽ ഉണ്ടായത്. ആ കുറവ് ഒന്നാം ക്ലാസിൽ എത്തുന്ന കുട്ടികളുടെ എണ്ണത്തിലും സ്വാഭാവികമായും പ്രതിഫലിക്കും. കഴിഞ്ഞ മാർച്ചിൽ 4.03 ലക്ഷം കുട്ടികൾ 10–ാം ക്ലാസ് പഠനം പൂർത്തിയാക്കിയ സ്ഥാനത്ത് ഈ അധ്യയന വർഷം ഒന്നാം ക്ലാസിൽ എത്തിച്ചേർന്നത് 2.51 ലക്ഷം കുട്ടികളാണ്. കേരളത്തിൽ ജനിച്ച എല്ലാ കുട്ടികളും ഇവിടെ പഠിക്കണമെന്നില്ല. മറ്റു സംസ്ഥാനങ്ങളിൽ ജനിച്ച കുട്ടികൾ കേരളത്തിൽ പഠിക്കുന്നുമുണ്ട്. കഴിഞ്ഞ അധ്യയന വർഷം ഒന്നു മുതൽ 9 വരെ ക്ലാസുകളിൽ 30.02 ലക്ഷം കുട്ടികളാണ് പഠിച്ചിരുന്നത്. എന്നാൽ ഈ അധ്യയന വർഷം 2 മുതൽ 10 വരെ ക്ലാസുകളിലുള്ളത് 30.37 ലക്ഷം കുട്ടികളാണ്. 2 മുതൽ 10 വരെ ക്ലാസുകളിലായി 35000 കുട്ടികൾ കൂടുതലായി എത്തിയെന്നാണ് ഇത് വ്യക്തമാക്കുന്നത്’– മന്ത്രി ചൂണ്ടിക്കാട്ടി.