ആരോഗ്യ സർവകലാശാല വിസി:‘ചട്ടപ്പടി’ എതിർപ്പുമായി സർക്കാർ

തിരുവനന്തപുരം ∙ ആരോഗ്യ സർവകലാശാല വൈസ് ചാൻസലറായി ഡോ.മോഹനൻ കുന്നുമ്മലിനു പുനർനിയമനം നൽകിയ ഗവർണറുടെ അപ്രതീക്ഷിത നീക്കത്തിൽ എതിർപ്പുണ്ടെങ്കിലും സർക്കാർ തൽക്കാലം പതിവുരീതിയിലുള്ള കടന്നാക്രമണത്തിനില്ല. ഡിജിറ്റൽ, സാങ്കേതിക സർവകലാശാലാ വിസിമാരെ സർക്കാരിന്റെ താൽപര്യത്തിനു നിയമിച്ചുള്ള അനുരഞ്ജന നീക്കം ഗവർണർ നടത്താനാണ് സാധ്യത. ഡിജിറ്റൽ സർവകലാശാലാ വിസി സ്ഥാനത്തുനിന്ന് ഇന്നു വിരമിക്കുന്ന ഡോ.സജി ഗോപിനാഥിനെ സാങ്കേതിക സർവകലാശാലയിലും സാങ്കേതിക സർവകലാശാലയിലെ മുൻ വിസി ഡോ.എം.എസ്.രാജശ്രീയെ ഡിജിറ്റലിലും നിയമിക്കണമെന്നതാണു സർക്കാരിന്റെ താൽപര്യം. യുജിസി മാനദണ്ഡത്തിനു വിരുദ്ധമായി നിയമിച്ചെന്ന പേരിൽ മറ്റു വിസിമാരെ ഗവർണർ നീക്കിയെങ്കിലും സജിയെ നീക്കിയില്ല. ഗവർണർ–സർക്കാർ പോരിന്റെ പേരിൽ  സ്ഥാനം നഷ്ടപ്പെട്ട രാജശ്രീയോടും മൃദുസമീപനം സ്വീകരിച്ചേക്കും.