ടോറസ് ലോറി പാഞ്ഞുകയറി; വീടിന്റെ മുൻവശം പൂർണമായും തകര്‍ന്നു

മേലുകാവ് ∙ നിയന്ത്രണംവിട്ട് വീട്ടിലേക്കു പാഞ്ഞുകയറിയ ടോറസ് ലോറി മുറ്റത്തു നിർത്തിയിട്ടിരുന്ന 2 സ്കൂട്ടറുകളും ഒരു കാറും തകർത്തു. അയൽവീട്ടിൽ പോയിരുന്നതിനാല്‍ വീട്ടുകാർ രക്ഷപ്പെട്ടു. കൊച്ചോലിമാക്കൽ മേഴ്സി ജയിംസിന്റെ വീട്ടിലേയ്ക്കാണു ലോറി കയറിയത്. അപകട സമയം മേഴ്സിയും മകൻ അനീഷും വീട്ടിൽ ഇല്ലായിരുന്നു. വീടിന്റെ മുൻവശം പൂർണമായും തകര്‍ന്നു. ലോറി ഡ്രൈവർക്ക് പരുക്കുണ്ട്.

5 വർഷം മുൻപ് പണിത വീട് പൂർണമായും വിണ്ടുകീറിയ നിലയിലാണ്. ബുധനാഴ്ച വൈകിട്ട് 5 മണിയോടെ കാഞ്ഞിരംകവലയിലാണു അപകടം. മങ്കൊമ്പിൽ പ്രവർത്തിക്കുന്ന പാറമടയിൽനിന്നു കരിങ്കല്ലുകയറ്റി വന്ന ലോറിയാണ് അപകടത്തിൽപ്പെട്ടത്. ഇറക്കം ഇറങ്ങി വന്ന ലോറി ചുറ്റുമതിൽ തകർത്തു വീടിന്റെ കാർപോർച്ച് ഭാഗത്താണ് ഇടിച്ചത്. കോൺക്രീറ്റ് തൂണുകളും ബീമുകളും ജനലുകളും തകർന്നു. 

English Summary: Lorry accident in melukavu