പാലാ സീറ്റ് നഷ്ടമായതിൽ സങ്കടമുണ്ട്; എല്‍ഡിഎഫ് വേദിയിൽ തുറന്നുപറഞ്ഞ് എൻസിപി

കൊച്ചി∙ പാലാ സീറ്റ് ലഭിക്കാത്തതിൽ എല്‍ഡിഎഫ് ജാഥാ ഉദ്ഘാടനവേദിയില്‍ പ്രതിഷേധമറിയിച്ച് എൻസിപി സംസ്ഥാന പ്രസിഡന്റ് ടി.പി.പീതാംബരന്‍. പാലാ സീറ്റ് നഷ്ടപ്പെട്ടതില്‍ സങ്കടവും പ്രതിഷേധവുമുണ്ട്. എന്നാലും എല്‍ഡിഎഫില്‍ ഉറച്ചുനില്‍ക്കും. മാണി സി.കാപ്പന്‍ പോയതില്‍ സങ്കടമുണ്ടെന്നും പീതാംബരൻ പറഞ്ഞു.

എൽഡിഎഫ് വിട്ട മാണി സി.കാപ്പൻ ഞായറാഴ്ച, പ്രതിപക്ഷ നേതാവ് രമേശ് ചെന്നിത്തല നയിക്കുന്ന ഐശ്വര്യ കേരള യാത്ര പാലായിൽ എത്തിയപ്പോൾ പങ്കെടുത്തിരുന്നു. പാർട്ടിയായി തന്നെ യുഡിഎഫിൽ ചേരുമെന്നും ഇപ്പോഴത്തെ പാർട്ടി സ്ഥാനമാനങ്ങൾ രാജിവയ്ക്കുമെന്നും കാപ്പൻ വ്യക്തമാക്കി. പ്രകടനമായെത്തിയ കാപ്പനും അനുയായികളും ഐശ്വര്യ കേരളയാത്രയ്ക്കൊപ്പം ചേരുകയായിരുന്നു.

എൻസിപിയിൽനിന്ന് മാണി സി. കാപ്പൻ അടക്കം 10 പേരാണ് രാജിവച്ചത്. ‘എൻസിപി കേരള’ എന്ന പേരിൽ യുഡിഎഫിൽ ഘടകകക്ഷിയാകുമെന്ന് മാണി സി. കാപ്പൻ ശനിയാഴ്ച വ്യക്തമാക്കിയിരുന്നു. പുതിയ പാർട്ടിയുടെ പ്രഖ്യാപനം തിങ്കളാഴ്ച ഉണ്ടാകുമെന്നും കാപ്പൻ വ്യക്തമാക്കിയിട്ടുണ്ട്.

English Summary: NCP State Chief TP Peethambaran Expresses Disappointment on Pala Seat