‘ചുവപ്പ്, നീല, ചുവപ്പ്..’: മഹാരാജാസിൽ ബാനർ പോര്; ചുട്ടമറുപടികൾ നിറയുന്നു

കൊച്ചി ∙ എറണാകുളം മഹാരാജാസ് കോളജിൽ എസ്എഫ്ഐയും കെഎസ്​യുവും തമ്മിലുള്ള ബാനർ പോര് മുറുകുന്നു. കോളജിന്റെ പ്രവേശന കവാടത്തിന് മുന്നിൽ ഒന്നിന് മുകളിൽ ഒന്നായി ബാനറുകൾ ഉയരുകയാണ്. തല്ലിത്തീർക്കാതെ ആശയങ്ങൾ കൊണ്ടുള്ള ഈ പോരാട്ടം സൈബർ ഇടങ്ങളിലും നല്ല ചർച്ചകൾക്കാണ് തുടക്കമിട്ടിരിക്കുന്നത്.

എസ്എഫ്ഐയെ നിരോധിക്കണമെന്ന ആവശ്യം ഹൈബി ഈഡൻ എംപി പാർലമെന്‍റിൽ ഉന്നയിച്ചതോടെയാണ് തുടക്കം. ഒരുകാലത്ത് കെഎസ്​യുവിന്റെ കോട്ടയായിരുന്ന മഹരാജാസ് ഇപ്പോൾ എസ്എഫ്ഐയുടെ ചെങ്കോട്ടയാണ്. ‘ഇന്ദിരയ്ക്ക് കഴിഞ്ഞിട്ടില്ല, പിന്നല്ലേ ഈഡന്..’ ഇതായിരുന്നു ഹൈബിക്കുള്ള എസ്എഫ്ഐയുടെ ആദ്യ ബാനർ മറുപടി. കോളജിൽ അത്ര ശക്തമല്ലെങ്കിലും കെഎസ്​യുവും വെറുതെയിരുന്നില്ല.

ചുവന്ന ബാനറിന് മുകളിൽ നീല ബാനർ ഉയർത്തി കെഎസ്​യുക്കാരുടെ മറുപടിയും എത്തി. ‘ജനഹൃദയങ്ങളിലാണ് ഇന്ദിരയും ഈഡനും’. പിന്നാലെ എത്തി ചുവന്ന ബാനർ. ‘അതേ, ജനഹൃദയങ്ങളിലുണ്ട് അടിയന്തരാവസ്ഥയുടെ നെറികേടുകളിലൂടെ..’ ഇതിനുള്ള മറുപടി ഉടനെത്തുമെന്നാണ് സൂചന. പരസ്പരം തല്ലാതെ ആശയത്തെ ആശയം െകാണ്ട് നേരിടുന്ന ഈ രീതി മാതൃകയാണെന്നാണ് സമൂഹമാധ്യമങ്ങളിലെ പ്രശംസ.

English Summary: SFI-KSU banner fight at Maharajas college, Ernakulam.