ആഘോഷങ്ങൾക്കിടെ വിമാനം തകർന്നു വീണു; പൈലറ്റിനു ദാരുണാന്ത്യം- വിഡിയോ

മെക്സിക്കോ∙ മെക്സിക്കോയിൽ ആഘോഷങ്ങളുടെ ഭാഗമായി വാടകയ്ക്കെടുത്ത വിമാനം പാർട്ടിക്കിടെ തകർന്നു വീണ് പൈലറ്റിനു ദാരുണാന്ത്യം. ആഘോഷങ്ങളുടെ ഭാഗമായി പറന്നു പൊങ്ങിയ വിമാനം അതിഥികൾ നോക്കി നിൽക്കേ നിമിഷങ്ങൾക്കകം തകർന്നു വീഴുന്നിതിന്റെ വിഡിയോ സമൂഹമാധ്യമങ്ങളിൽ പ്രചരിക്കുകയാണ്.

വളരെ സന്തോഷത്തോടെ പാർട്ടിയിൽ പങ്കെടുക്കുന്ന ദമ്പതികളിൽ നിന്നാണ് വിഡിയോ തുടങ്ങുന്നത്. പെട്ടെന്ന് പിങ്ക് നിറത്തിലുള്ള പുകയോടെ ഉയർന്നുപൊങ്ങിയ വിമാനം കാണികൾക്കു മുൻപിൽ തകർന്നു വീണു. അപകടത്തിൽ വിമാനത്തിന്റെ പൈലറ്റായ ലൂയിസ് ഏഞ്ചലിനു ഗുരുതരമായി പരുക്കേറ്റു. അദ്ദേഹത്തെ ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സമൂഹമാധ്യമങ്ങളിൽ വിഡിയോ വ്യാപകമായി പ്രചരിച്ചതോടെയാണ് സംഭവം പുറംലോകം അറിഞ്ഞത്. വിഡിയോയ്ക്കു താഴെ നിരവധി കമന്റുകളും എത്തി. ‘‘സംഭവത്തിന്റെ ഭീകരത മനസ്സിലാകാതെ ക്യാമറ വീണ്ടും ദമ്പതികളിലേക്കു തിരിക്കുന്നത് ഖേദകരമാണ്.’’– എന്നാണ് വിഡിയോയ്ക്കു താഴെ ഒരാൾ കമന്റ് ചെയ്തത്. ആഘോഷങ്ങളിൽ ഇത്തരം വിമാനങ്ങൾ ഉപയോഗിക്കുമ്പോൾ മുൻകരുതൽ നടത്തണമെന്ന രീതിയിലും നിരവധി കമന്റുകൾ എത്തി.

English Summary: Dramatic Plane Crash Caught on Video: Witness the Shocking Moments at Mexico Celebration