ശശി തരൂർ ജയിച്ചു പാർലമെന്റിൽ എത്തേണ്ടത് ആവശ്യം: ടി.പത്മനാഭൻ

തിരുവനന്തപുരം∙ ശാരീരിക ബുദ്ധിമുട്ടുകൾ വകവയ്ക്കാതെ ശശി തരൂരിന് വേണ്ടി വോട്ടഭ്യർഥിച്ച് സാഹിത്യകാരൻ ടി.പത്മനാഭൻ.  ശശി തരൂരിനു വേണ്ടി സംഘടിപ്പിച്ച എഴുത്തുകാരുടെ സംഗമത്തിലാണ് കാൽവിരലിന്റെ ശസ്ത്രക്രിയ നടത്തിയതിന്റെ വേദനയും ബുദ്ധിമുട്ടും അവഗണിച്ച് പത്മനാഭൻ എത്തിയത്.

ശശി തരൂർ ജയിച്ചു പാർലമെന്റിൽ എത്തേണ്ടത് ആവശ്യമാണെന്നതിനാലാണു ഈ വേദനയും സഹിച്ചു കണ്ണൂരിൽനിന്നു താൻ തരൂരിനു വേണ്ടി സംസാരിക്കാൻ എത്തിയതെന്നും പത്മനാഭൻ പറഞ്ഞു.

പാർലമെന്റിലേക്കും നിയമസഭയിലേക്കും ജനം തിരഞ്ഞെടുത്തയയ്ക്കുന്നത് അവിടെപ്പോയി ഗുസ്തി പിടിക്കാനല്ലെന്നും സംഗമത്തിൽ പങ്കെടുത്ത പത്മനാഭൻ പറ‍ഞ്ഞു.  പ്രശ്നങ്ങളെ ഇഴകീറി യുക്തിസഹമായി പരാമർശിക്കാനും, ജനകീയ പ്രശ്നങ്ങൾക്കു പരിഹാരമുണ്ടാക്കാനുമാണ് ജനപ്രതിനിധികൾ. അവിടെപ്പോയി ഒപ്പിട്ടു ബത്തയും വാങ്ങിപ്പോരുന്നതുകൊണ്ടു ജനത്തിനു ഗുണമൊന്നുമില്ലെന്നും അദ്ദേഹം കൂട്ടിച്ചേർത്തു.