‘ഒന്നും രണ്ടും സീറ്റുള്ളവർക്ക് കാബിനറ്റ് റാങ്ക്, 7 സീറ്റുണ്ടായിട്ടും തഴഞ്ഞു’: എൻസിപിക്കു പിന്നാലെ ശിവസേനയ്ക്കും അതൃപ്തി
![eknath-shinde-nda-meeting പാർലമെന്റിൽ നടന്ന എൻഡിഎ യോഗത്തിൽ പങ്കെടുക്കാനെത്തുന്ന മഹാരാഷ്ട്ര മുഖ്യമന്ത്രി ഏക്നാഥ് ഷിൻെഡ. ചിത്രം : മനോരമ](https://img-mm.manoramaonline.com/content/dam/mm/mo/news/just-in/images/2024/6/11/eknath-shinde-nda-meeting.jpg?w=1120&h=583)
Mail This Article
ന്യൂഡൽഹി∙ മൂന്നാം മോദി സർക്കാർ അധികാരത്തിലേറിയതിനു പിന്നാലെ എൻഡിഎയിൽ പൊട്ടിത്തെറി. മന്ത്രിസഭാ രൂപീകരണവും വകുപ്പ് വിഭജനവും പൂർത്തിയായതിനു പിന്നാലെ ശിവസേനാ ഷിൻഡെ പക്ഷമാണ് ആദ്യ വെടിപൊട്ടിച്ചത്. എൻഡിഎയിൽ ഇരട്ട നീതിയാണെന്നാണ് ഷിൻഡെ പക്ഷത്തിന്റെ ആരോപണം. ഏക്നാഥ് ഷിൻഡെ വിളിച്ചു ചേർത്ത എംപിമാരുടെ യോഗത്തിൽ നേതാക്കൾ അതൃപ്തിയറിയിച്ചു. എൻഡിഎയിലെ മൂന്നാമത്തെ വലിയ കക്ഷി ആയിട്ടും കാബിനറ്റ് മന്ത്രിസ്ഥാനം നൽകാതെ ശിവസേനയെ തഴഞ്ഞെന്നാണ് പ്രധാന പരാതി.
ഒന്നും രണ്ടും സീറ്റുകളുള്ള പാർട്ടികൾക്ക് കാബിനറ്റ് മന്ത്രിസ്ഥാനം നൽകി. ശിവസേനയ്ക്ക് ലഭിച്ചത് സ്വതന്ത്ര ചുമതലയുള്ള സഹമന്ത്രി സ്ഥാനമാണ്. ബിജെപിയുടെ ദീർഘകാലമായുള്ള സഖ്യകക്ഷി എന്ന പരിഗണന പാർട്ടിക്ക് കിട്ടിയില്ലെന്നും ഷിൻഡെ വിഭാഗം എംപി ശ്രീരംഗ് ബർനെ പറഞ്ഞു. എൻസിപി അജിത് പവാർ വിഭാഗത്തിനും ക്യാബിനറ്റ് പദവി കിട്ടാത്തതും അനീതിയെന്ന് ബർനെ പറഞ്ഞു.
കാബിനറ്റ് പദവി ലഭിക്കാത്തതിൽ എൻസിപി പ്രതിഷേധം അറിയിച്ചതിനു പിന്നാലെയാണ് ശിവസേനയും അതൃപ്തി കടുപ്പിക്കുന്നത്. എന്നാൽ ബിജെപിക്ക് നിരുപാധിക പിന്തുണയെന്നും വിലപേശാൻ ഇല്ലെന്നും ശ്രീകാന്ത് ഷിൻഡെ എംപി പറയുന്നു.
ശിവസേനയിലെ പ്രതാപ് റാവു ജാദവിന് ആയുഷ് വകുപ്പിന്റെ സ്വതന്ത്ര ചുമതലയുള്ള സഹമന്ത്രി സ്ഥാനമാണ് ലഭിച്ചത്. നാലു മാസത്തിനകം മഹാരാഷ്ട്രയിൽ നിയമസഭ തിരഞ്ഞെടുപ്പ് നടക്കാനിരിക്കെ ശിവസേനയ്ക്കും എൻസിപിക്കും മന്ത്രിസ്ഥാനം നൽകാത്തത് ശ്രദ്ധേയമാണ്.