പാക്കിസ്ഥാനിൽ 12കാരിയെ 72കാരനു വിവാഹം ചെയ്തു കൊടുക്കാൻ ശ്രമം; രക്ഷകരായി പൊലീസ്
![child-marriage child-marriage](https://img-mm.manoramaonline.com/content/dam/mm/mo/news/just-in/images/2022/6/25/child-marriage.jpg?w=1120&h=583)
Mail This Article
ലഹോർ∙ പാക്കിസ്ഥാനിൽ പ്രായപൂർത്തിയാകാത്ത പെൺകുട്ടിയെ 72കാരന് വിവാഹം ചെയ്തുനൽകാനുള്ള ശ്രമം പൊലീസ് തടഞ്ഞു. ഖൈബർ പഖ്തൂൺഖ്വ പ്രവിശ്യയിലെ ചാർസഡ്ഡാ നഗരത്തിലാണ് സംഭവം. 72കാരനായ ഹബീബ് ഖാൻ എന്നയാളെ വിവാഹം ചെയ്യാൻ 12കാരിയായ പെൺകുട്ടിയെ പിതാവാണ് നിർബന്ധിച്ചതെന്ന് പൊലീസ് പറഞ്ഞു. ഇയാളിൽനിന്ന് പെൺകുട്ടിയുടെ പിതാവ് പണവും കൈപ്പറ്റിയിരുന്നു.
5 ലക്ഷം പാക്കിസ്ഥാനി രൂപയാണ് ഹബീബ് ഖാനിൽനിന്ന് പെൺകുട്ടിയുടെ പിതാവായ ആലം സയ്യീദ് കൈപ്പറ്റിയത്. കുട്ടിയെ ഹബീബിന് കൈമാറാമെന്ന വ്യവസ്ഥയിലായിരുന്നു ഇത്. വിവരമറിഞ്ഞെത്തിയ പൊലീസ് വിവാഹം നടക്കുന്നതിനു മുൻപ് പെൺകുട്ടിയെ രക്ഷപ്പെടുത്തി. ഹബീബ് ഖാനെയും നിക്കാഹിന് കാർമികത്വം വഹിക്കാനെത്തിയ ആളെയും കസ്റ്റഡിയിലെടുത്തു.
ആലം സയ്യീദ് സംഭവസ്ഥലത്തുനിന്നും രക്ഷപ്പെട്ടു. ഇയാൾക്കെതിരെ ശൈശവ വിവാഹ നിരോധന നിയമപ്രകാരം കേസെടുത്തു.